©Sputnik / Abzal Kaliev
Qazaqstandyq oqýshylar 1 maýsym men 1 qyrkúiek aralyǵynda jazǵy demalysta bolady. Bul týraly Oqý-aǵartý ministrligi málimdedi, - dep habarlaidy "Ult aqparat".
Vedomstvo málimetinshe, mamandar ministrlikke oqý jylyn maýsymnyń sońyna deiin uzartyp, 20 tamyzdan bastaý múmkindigin qarastyrý týraly ótinishpen birneshe ret júgingen.
«Sarapshylar Qazaqstan álemdegi eń uzaq kanikýl - 130 kún bolatyn elderdiń qataryna kiretinin alǵa tartty. Al basqa da elderde kanikýl merzimi 80-nen 100 kúnge deiin. Sonymen qatar 5 kúndik oqý aptasyna kóshken kezde oqý kúnderiniń sany birden 34 kúnge azaidy. Osylaisha, orta eseppen alǵanda, bizdiń elimizdegi oqý kúnderiniń jalpy sany shamamen 150 kún bolsa, damyǵan elderde bul shamamen 200 kún. Sondai-aq mamandar qosymsha oqý aptalarynyń qosylýy kúndelikti sabaqtyń sanyn, iaǵni muǵalimniń de, oqýshynyń da kúndelikti oqý júktemesin azaitatynyn atap ótti. Alty kúndik kóptegen mektep jańa talapqa sai bes kúndik oqý aptasyna aýysa alady. Bul pedagogter jumysynyń tiimdiligin arttyryp, oqýshylardyń materialdy meńgerýine yqpal etedi. Bul sheshimder kúrdeli taqyryptardy oqýdyń qarqynyn tómendetedi, oqylǵan materialdy qaitalaýǵa jáne bekitýge ýaqyt beredi» - delingen habarlamada.
Osy oraida ministrlik ókilderi ózgerister jazǵy demalysqa áser etpeitinin túsiný mańyzdy ekenin aitty.
«Oqý jylyn uzartýdy qoldaýshylar 4-toqsandy 20-25 maýsymǵa deiin sozýdy jáne oqýdy 20 tamyzdan bastaýdy usynyp otyr. Mamandar birneshe jyldan beri dabyl qaǵyp, oqýshylarymyzdyń jazǵy ýaqyttaryn kompiýter men smartfondarda oiyn oinaýmen ótkizip jatqanda, olardyń qatarlastary bilim alyp, oqyp jatqanyn aityp keledi. Olar buǵan deiin de óz dálelderin keltirgen bolatyn. Biz ǵalymdar, psihologtar, ata-analar men pedagogterden quralǵan jumys tobyn qurdyq. Halyqaralyq tájiribe de zerdelendi. Jumys toby mamandardyń usynystaryn qoldamai, balamaly usynys engizdi: oqý jylynyń bastalý merzimin ózgertpei, ony burynǵydai 1 qyrkúiekte qaldyrý, al oqý jylynyń aiaqtalý merzimin 31 mamyrǵa belgileý. Osylaisha, kanikýlǵa shyǵýdyń aiyrmashylyǵy nebári 5 kún bolady. Al jaz bastalǵanda, iaǵni 1 maýsymnan bastap balalar demalysqa shyǵa alady. Osylaisha, jaz boiy, iaǵni 1 maýsym men 1 qyrkúiek aralyǵynda balalar kanikýlda bolady. Bul oraida biz sapany tek oqý kúnderi arqyly ǵana emes, jalpy oqý júktemesin azaitý, oqý baǵdarlamalaryn jetildirý, mamandardyń biliktiligin arttyrý jáne t.b. joldar arqyly jaqsartamyz. Sondai-aq, jańa oqý jylynan bastap mektepterde aptalyq oqý júktemesin azaitý josparlanyp otyr. Odan bólek, oqý jylynyń uzaqtyǵyn sozý oqýshylarǵa qosymsha bilimge kóbirek ýaqyt bólýge múmkindik beredi, óitkeni sabaq az bolady, mektepterdiń kabinet qoryna túsetin júkteme de azaiady», - dedi Mektepke deiingi jáne orta bilim komiteti tóraǵasy Gúlmira Kárimova.
Salystyrmaly túrde alyp qaraityn bolsaq, Germaniia, Angliia jáne Japoniiada jazǵy demalys 7 apta, Polsha, Qytai jáne Ońtústik Koreiada 7-9 apta, Finliandiia, Vengriia, Shvetsiiada 9-11 apta, Latviia, Italiia jáne Portýgaliiada 11 apta, Qazaqstanda - 14 aptaǵa sozylady.
