Óndiristik kásiporyndar ornalasqan óńirlerde ókpe isigine shaldyǵý joǵary. Bul týraly «Qazaq onkologiia jáne radiologiia ǵylymi-zertteý institýty» AQ basqarma tóraiymynyń klinikalyq jumys jónindegi orynbasary Nurlan Baltabekov «Ókpe qaterli isigi. Ozyq sheshimder» taqyrybynda ótip jatqan onlain halyqaralyq konferentsiiada aitty, dep habarlaidy QazAqparat.
Onyń aitýynsha, álem boiynsha jáne elimizde ókpe qaterli isiginen kóz jumatyndar sany joǵary.Oǵan qosa, ony erteń kezeńde diagnostikalaý deńgeii óte tómen bolyp otyr.
«Qazaqstanda ókpe qaterli isigin birinshi satyda anyqtaý tek 6%-y qurap otyr. Eýropa elderinde de osy jaǵdai, tek AQSh-ta tómen dozaly tomografiianyń arqasynda bul kórsetkish 17-20 paiyzǵa jetip otyr. Elimizde ókpe qaterli isigimen ásirese erkekter kóp aýyrady. Degenmen sońǵy 5-7 jylda áielder arasynda aýyrshańdyq ósti, óitkeni áielder arasynda tekmeki shegý ádeti ulǵaiǵan», - deidi ol.
Ókpe ragyna tek temeki shegýmen ǵana emes, ónerkásiptik óndiris oryndarynyń da áseri bar eken. Elimiz boiynsha ókpe qaterli isigine shaldyǵý Soltústik Qazaqstan, Pavlodar, Shyǵys Qazaqstan, Qostanai, Qaraǵandy oblystarynda óte joǵary.
«Qaraǵandy oblysynyń Temirtaý, Jezqazǵan, Balqash qalalarynda ókpe ragy joǵary bolyp tur. Al, óndiris oshaqtary az jáne erler men áielder arasynda temeki shegý ádetke ainalmaǵan Túrkistan oblysynda bul aýrýdyń kórsetkishi óte tómen. Skrining jumystaryn júrgizgende osy kórsetkishterdi eskerý qajet, iaǵni óndiris oshaqtary bar óńirler birinshi kezekte nazarda bolý kerek. Sol kezde Qazaqstan boiynsha aýrýshańdyq birden tómendeidi», - deidi Nurlan Baltabekov.
Qaterli isik aýrýyn zertteý jónindegi halyqaralyq agenttiktiń málimetinshe, jyl saiyn 2 millionnan astam adam ókpe qaterli isigimen aýyrady, olardyń úshten ekisi – er adamdar.
Aita keteiik, Almatyda «Qazaq onkologiia jáne radiologiia ǵylymi-zertteý institýty» AQ, «Qazaqstandyq onkologtar qaýymdastyǵy» QB-nyń uiymdastyrýymen ótip jatqan konferentsiiaǵa Italiia, Túrkiia, Ispaniia, Resei, Belorýssiia jáne Qazaqstannyń onkologiialyq ortalyqtardyń sarapshylary qatysyp jatyr.
