Ulttyq bank tóraǵasynyń orynbasary Mádina Ábilqasymovanyń aitýynsha, teńgemen beriletin bizneske arnalǵan nesieler boiynsha syiaqy mólsherlemesi 0,5 paiyzǵa tómendegen, dep habarlaidy QazAqparat.
«Ulttyq bank qyzmetiniń basym baǵyty – ekonomikany nesieleý deńgeiin ósirý. Bankterdiń nesie belsendiligi birtindep qalpyna kele bastady. Biyl sáýir-qyrkúiek aralyǵynda bank sektorynyń kredittik portfeli 7,4 paiyzǵa nemese 921,8 mlrd teńgege ósip, jalpy 13,4 trln teńgege deiin ósti. Zańdy tulǵalarǵa kredit kólemi osy jyldyń I toqsanynda biznestiń jumys istemeitin nesielerin esepten shyǵarýyna bailanysty 8,1 paiyzǵa azaiyp, 7,2 trln teńge kóleminde qaldy», - dedi Mádina Ábilqasymova Parlament Senatynyń Qarjy jáne biýdjet komitetiniń otyrysyndaǵy «2020-2022 jyldarǵa arnalǵan respýblikalyq biýdjet týraly» zań jobasynyń tanystyrylymynda.
Ulttyq bank tóraǵasy orynbasarynyń aitýynsha, Qazaqstanda nesie berý sharttary jaqsarǵan. Teńgemen beriletin bizneske arnalǵan nesieler boiynsha syiaqy mólsherlemesi ótken jyldyń qyrkúiegindegi 12,2 paiyzdan búginde 11,7 paiyzǵa tómendegen.
«Qazir bank júiesinde keshendi túrde bank aktivteriniń sapasyn táýelsiz baǵalaý jumysy jalǵasyp keledi. Aktivterdiń sapasyn baǵalaýdy osy jyldyń jeltoqsanynda aiaqtaý josparlanyp otyr. 2020 jyldyń aqpanynda banktermen túzetý is-qimyldarynyń jeke josparlaryn talqylap, bekitemiz. Ótkiziletin is-sharalardyń nátijesinde bank júiesiniń ashyqtyǵyn arttyryp, nyǵaitý kózdelgen. Bul qadam bankterdiń ekonomikany nesieleý kólemin arttyrýǵa múmkindik beredi», - dedi ol.
Mádina Ábilqasymova ekonomikany nesieleý úshin bankterdi uzaq merzimdi teńgemen qorlandyrý úshin 600 mlrd teńgege «Jeńildikti nesieleý baǵdarlamasy» iske asyrylǵanyn atap ótti. Onyń aitýynsha, biyl 18 qazanǵa deiin bankterde 263,8 mlrd teńge somaǵa 368 joba qaralyp jatyr. Qazirge deiin 46,6 mlrd teńgeniń 127 nesiesi berilip qoiǵan.
