Elimizde nekeden tys týǵan balaǵa da ákesiniń aliment tólep turýy mindetti bolmaq. Bul týraly Májilis depýtaty Svetlana Bychkova aitty, dep habarlaidy QazAqparat tilshisi.
Aita keterligi, búgin QR Parlamenti Senaty Áleýmettik-mádeni damý jáne ǵylym komitetiniń keńeitilgen otyrysynda balanyń quqyqtaryn qorǵaý máselesi qaraldy.
Jiynda S.Bychkova balanyń quqyqtaryn qorǵaý máselesi jónindegi fýnktsiialardy júzege asyratyn uiymdardyń qyzmetine bailanysty máseleler boiynsha ózgerister men tolyqtyrýlar kózdelgen zań jobasyn tanystyrǵan edi.
«2018 jyldyń maýsymynda Konstitýtsiialyq keńeske úndeý joldanyp, onda er-azamatpen nekede turmaǵan analar dúniege ákelgen balalardyń bul turǵyda quqyqtary shektelgeni kórsetilgen. Eger erkekter olarǵa aliment tólegisi kelmese, onda balalar alimentten qaǵylady. Sondyqtan túptep kelgende ondai balalar nekedegi áielderden týǵan balalarmen teńestirilgen edi. Bul rette jaǵdaiǵa bailanysty naqty sharttardy sot aiqyndaidy», - dedi Májilis depýtaty otyrys qatysýshylarynyń saýalyna jaýap bere kele.
Talqylaý barysynda Neke jáne otbasy týraly kodekstiń 47-babyna tolyqtyrýlar engiziletindigi atalyp ótildi. Atalǵan tolyqtyrýlarda er-azamat nekeden tys týǵan ortaq balalaryn asyraý úshin onyń anasynyń shyǵyndaryn óteitindigi kózdelgen. Sonymen qatar, dál osy normada sot aqsha qarajatynyń kólemi men tólem merzimdiligin taraptardyń materialdyq jáne otbasylyq jaǵdaiyna bailanysty aiqyndaityndyǵy kórsetilgen.
