«QazMunaiGaz» UK» AQ munai óńdeý jáne munai himiiasy departamentiniń direktory Makeev Dmitrii Pavlodar munai óńdeý zaýytyn jóndeýge qatysty túsinik berdi, dep habarlaidy QazAqparat.
Aita keteiik, biylǵy 1 qazannan bastap Pavlodar munai-himiia zaýyty josparly jóndeý jumystaryna toqtaidy.
«Úsh munai óńdeý zaýytynda dizel otynyn óndirýdiń aǵymdaǵy kólemi táýligine 16 myń tonna shamasynda. Sonymen birge, elimizde dizel otynyn tutynýdyń óte joǵary deńgeii saqtalyp otyr, iaǵni táýligine 16,5 myń tonna. 1 qazanda Pavlodar zaýyty josparly jóndeýge toqtaidy. Osy oraida Atyraý jáne Shymkent munai óńdeý zaýyttarynyń dizel otynyn táýliktik óndirý kólemi 9,5 myń tonnaǵa jýyq. Qazan aiynda Atyraý zaýyty 133 myń tonna, al Shymkent zaýyty 161 myń tonna dizel otynyn óndiredi. Pavlodar munai óńdeý zaýyty jóndeýge toqtaǵanǵa deiin kásiporynda 27 myń tonna kóleminde qor jinaqtalady. Sonymen qatar, AI-92 benzini boiynsha 45 myń tonna jáne AI-95-ke qatysty 2 myń tonna mólsherinde qor jasalady» - dedi Makeev Ortalyq kommýnikatsiialar qyzmetinde.
Onyń sózine qaraǵanda, Pavlodar munai-himiia zaýytyn iske qosý biylǵy qazan aiynyń sońyna deiin bolady. Taýarlyq dizel táýligine 6 myń tonna kóleminde 28 qazannan bastap jóneltile bastaidy.
«Pavlodar zaýytynda kúrdeli jóndeý jumystary 2018 jyldan beri júrgizilmedi. Otandyq munai óńdeý zaýyttarynda aǵymdaǵy jóndeý jyl saiyn ótkizilse, kúrdeli jóndeý 3 jylda bir ret atqarylady», - dedi «QazMunaiGaz» kompaniiasynyń ókili.
