QR Energetika ministri Nurlan Noǵaev pen Aqtóbe oblysynyń ákimi Ońdasyn Orazalin óńirdegi munai-gaz salasynyń birqatar nysanyn aralady, dep habarlaidy "Ult aqparat".
Ministrlik málimetinshe, delegatsiia «Gas Processing Company» JShS-nyń «Qojasai» gaz óńdeý zaýytynyń jumysymen tanysyp, Jańajol gaz óńdeý zaýytynda jáne «SNPS – Aqtóbemunaigaz» AQ-nyń gaztýrbinaly elektr stansasynda boldy. Sapar qorytyndysy boiynsha munai-gaz salasy, kásipkerler, Energetika ministrligi men Aqtóbe oblysy ákimdigi ókilderiniń qatysýymen kezdesý ótti.
«Oblys ákimi Energetika ministrliginiń aldyna ken oryndaryna jaqyn ornalasqan eldi mekenderdi gazben jabdyqtaýǵa járdemdesý, sondai-aq olardyń turǵyndaryn jumyspen qamtamasyz etý máselesin qoiyp otyr. Biz jer qoinaýyn paidalanýshylarmen osy máselelerdi pysyqtap, olardyń áleýmettik jaýapkershiligi aiasynda qoldaý kórsetemiz. Sondai-aq jer qoinaýyn utymdy paidalaný jáne qorshaǵan ortaǵa áserdi azaitý óte mańyzdy. Jer qoinaýyn paidalanýshynyń kelisimsharttyq merzimi aiaqtalǵanymen, ken orny men oǵan irgeles jerdi paidalaný merzimi aiaqtalmaidy. Bizdiń ortaq mindetimiz – ken oryndarynyń qyzmet etý merzimin ulǵaitý. Bul tek uqypty paidalaný kezinde ǵana múmkin bolady. Bul másele ministrliktiń turaqty baqylaýynda», - dedi Nurlan Noǵaev.
Áńgimelesý barysynda birqatar kásipker ózderiniń kózqarasy boiynsha jekelegen jer qoinaýyn paidalanýshylardyń satyp alýlarynyń ashyqtyǵyna alańdaýshylyq bildirdi. Sondai-aq ýákiletti organdardan munai-gaz salasyndaǵy satyp alýlardaǵy jergilikti qamtýdy ulǵaitý jónindegi jumysty kúsheitýdi surady.
Nurlan Noǵaevtyń aitýynsha, qazirgi ýaqytta Qazaqstanda Chevron komapniiasy 248,5 million AQSh dollaryn bólýdi josparlap otyrǵan Jergilikti qamtýdy damytý qory qurylýda. Osy qordan investitsiialar tehnologiialar men IT-ge, bazalyq taýarlar óndirisine, munai-gaz sektory jabdyqtarynyń jekelegen túrlerin jinaqtaýǵa jáne qorshaǵan ortany qorǵaýǵa salynatyn bolady. Budan basqa, elimizde munai-gaz mashinasyn jasaý men servisti damytýdyń halyqaralyq ortalyǵy qurylatyn bolady. Onyń maqsaty - QR-dyń munai-gaz salasyna arnalǵan taýarlar men kórsetiletin qyzmetter óndirisin oqshaýlaý.
«Óz kezeginde jer qoinaýyn paidalanýshylar da óz mindettemelerine, jergilikti qamtýdy damytýǵa jaýapkershilikpen qaraýy tiis. Kásipkerlerdiń shaǵymdary negizdi dep sanaimyn. Munai-gaz salasynda tapsyrystardy oryndaityn shartty otandyq firmalardyń túpkilikti benefitsiary sheteldik kompaniialar nemese jeke tulǵalar bolyp tabylatyn jaǵdailar kezdesip jatady. Ártúrli amal-aila qoldanýdyń qajeti joq. Qazaqstanǵa jumys isteýge kelgen investorlar jergilikti qamtýdy damytý, qazaqstandyqtardy jumysqa ornalastyrý boiynsha mindettemelerdi ózine alady, olardy oryndaý qajet», - dep atap ótti ministr.
Sonymen qatar ol jasandy kedergiler qoiý jáne belgili bir kompaniialar úshin arnaiy jaǵdailar jasaý qolaisyz ekendigin basa aitty.
«Bizge usynys engizińizder. Olardy barlyq qajetti memlekettik organdar men qoǵamdyq uiymdardy tarta otyryp qarastyratyn bolamyz. Biz óz quzyretimizdiń aiasynda iri munai-gaz operatorlarynyń jyldyq satyp alý josparlaryn jariialaýyna qol jetkizdik. Bul jumystardyń barlyǵy el basshylyǵy men Úkimettiń tapsyrmalaryn oryndaý aiasynda júrgiziledi. Men barlyq kompaniianyń basshylaryn buǵan tolyq jaýapkershilikpen qaraýǵa shaqyramyn», - dedi ol.
Energetika ministri jer qoinaýyn paidalanýshylardyń taýarlary men kórsetiletin qyzmetterin satyp alý kezinde tolyq ashyqtyqty qamtamasyz etýdi tapsyrdy.
Keńesti qorytyndylai kele, Aqtóbe oblysynyń ákimi Ońdasyn Orazalin kóterilgen máselelerdiń barlyǵy óńirdiń áleýmettik-ekonomikalyq damýy úshin mańyzdy ekenin atap ótti.
«Biz árqashan otandyq jáne sheteldik investorlardy qoldaimyz, bul óńirde jańa jumys oryndaryn ashýǵa, salyq bazasyn ulǵaitýǵa múmkindik beredi. Bul – Memleket basshysynyń tikelei tapsyrmasy. Biraq bul rette investorlar ózderiniń jaýapkershiligin sezinip, jergilikti halyq úshin áleýmettik máselelerdi sheshýge kómektesýi tiis. Biz jyl saiyn jer qoinaýyn paidalanýshylarmen áleýmettik mindettemeler týraly memorandýmdar jasasamyz, osynyń arqasynda búkil álem úshin biylǵy jyldyń óte kúrdeli bolǵanyna qaramastan, munai-gaz sektoryndaǵy jumys oryndarynyń qysqarýyna jol bermei, jalaqyny ulǵaitýǵa qol jetkizdik. Qiyndyqtar mezgil-mezgil týyndaidy, biz ony jasyrmaimyz. Áleýmettik aspektilerdi eskerip, óndiristik qyzmet saldarynan týyndaityn problemalar úshin júieli sheshimder tabý kerek», - dedi Ońdasyn Orazalin.
