Qazaqstanda múmkindigi shekteýli jandarǵa qyzmet kórsetý úshin aleumet.egov.kz portaly iske qosyldy. Bul týraly QR Eńbek jáne halyqty áleýmettik qorǵaý ministri Birjan Nurymbetov Úkimet otyrysynda aitty, dep habarlaidy QazAqparat.
«Biyl Amazon jáne AliBaba siiaqty servisterdiń qaǵidaty boiynsha múgedektigi bar adamdar úshin aleumet.egov.kz portaly iske qosyldy. Bul tsifrlyq joba kelesi múmkindikterge qol jetkizedi: Ońaltý quraldary men qyzmetterin óz betinshe tańdaý quqyǵy, olardy alý merzimin alty aidan 15 kúnge deiin qysqartý, biznes protsesteriniń ashyqtyǵy, deldaldyq qyzmetteri joiý, baǵany birizdi etý jáne biýdjet qarajatyn tiimdi paidalaný», - dep atap ótti ministr.
Búginde portalda ońaltý quraldary men qyzmetteriniń 1157 jetkizýshi tirkelgen jáne 24 myńnan astam tehnikalyq ońaltý quraly berildi. Portalǵa tolyq kóshý tehnikalyq ońaltý quraldarynyń barlyq 55 túri boiynsha 400 myńǵa jýyq alýshyny qamti otyryp, 2021 jyldyń qańtarynan bastap, júzege asyrylatyn bolady.
Aita keteiik, Qazaqstanda 705 myńnan astam múgedektigi bar adam turady. Onyń ishinde 430 myńy – eńbekke qabiletti jastar, 181 myńy – zeinet jasynda jáne 94 myńy – balalar. Biyl áleýmettik tólemderge, ońaltýdyń tehnikalyq quraldary men qyzmettermen qamtamasyz etýge 448 mlrd teńge baǵyttaldy. Bul ótken jylmen salystyrǵanda 12 paiyzǵa artyq.
«Elimizde múgedektigi bar adamdardyń quqyqtaryn qamtamasyz etý jáne turmys sapasyn jaqsartý jóninde 2025 jylǵa deiingi ulttyq jospar iske asyrylýda. Ulttyq jospar jeti baǵytty qamtityn 64 is-sharadan turady. Ol múgedektiktiń aldyn alý, bilimge qoljetimdilik, kedergisiz orta, jumyspen qamtý, tiimdi ońaltý, áleýmettik qyzmetter jáne qoǵamdyq sanany jańǵyrtý qyzmetteri. «Halyq únine qulaq asatyn memleket» qaǵidattaryna sáikes, múgedek jandar men qoǵamnyń pikirin eskere, biz osy jyly múgedektik merzimsiz belgilenetin qaitymsyz anatomiialyq kemistikter tizbesin keńeittik. Ońaltý boljamy qolaisyz adamdar úshin merzimder bes jylǵa deiin uzartyldy. Bala bes jylǵa nemese 16 jasqa deiin múgedek bolyp tanylatyn kórsetilimder keńeitildi», - deidi Birjan Nurymbetov.
