Búgin Úkimet otyrysynda QR Eńbek jáne halyqty áleýmettik qorǵaý ministri Mádina Ábilqasymova inkliýzivti bilim berý salasyn jaqsartý jumystary jóninde baiandady, dep habarlaidy QazAqparat tilshisi.
Ministrdiń aitýynsha, búgingi kúni 147 myńnan astam bala erekshe bilim berý qajettilikterine táýeldi. «Bilim men ǵylymdy damytýdyń 2016-2019 jyldarǵa arnalǵan memlekettik baǵdarlamasyna sáikes 2019 jylǵa qarai mektepke deiingi bilim beretin uiymdardyń 30%, orta bilim beretin uiymdardyń 70% sondai-aq tehnikalyq jáne kásiptik bilim beretin oqý oryndarynyń 40%-inde inkliýzivti bilim berý jaǵdailaryn jasaý josparǵa alynǵan», - dep atap ótti ministr Úkimet otyrysynda.
Onyń aitýynsha, balabaqshalardyń 15% jáne mektepterdiń 55%-de inkliýzivti bilim berý jaǵdailary jasalǵan, olarda erekshe bilim berýdi qajet etetin 40 myńnan astam bala oqyp, tárbielenip jatyr.
«Sonymen qatar, arnaiy baiandamashy Katalina Devandas Agilar jalpy bilim beretin mektepterge bekitilgen 10 000 múgedek bala is júzinde úide oqitynyn jáne mektepke múldem barmaitynyn atap ótti», - deidi ministr.
Osyǵan bailanysty, ministr Ábilqasymova Bilim jáne ǵylym ministrligine inkliýzivti bilim berýdi damytý maqsatynda kadrlardyń jetispeýshiligi, júieni ádistemelik qamtamasyz etý, kedergisiz orta qurý sheńberinde bilim berý uiymdarynyń materialdyq-tehnikalyq bazasyn nyǵaitý siiaqty máselelerdi sheshý qajettigin eskertti.
