Eńbek jáne halyqty áleýmettik qorǵaý ministrligi múgedekterdiń áleýmettik qorǵalýyn jaqsartatyn zań jobasyn jasap shyǵardy. Bul jóninde vedomstvonyń baspasóz qyzmeti habarlady.
QR Premer-ministriniń orynbasary Eraly Toǵjanovtyń tóraǵalyǵymen onlain rejimde ótken múgedekterdi áleýmettik qorǵaý salasyndaǵy úilestirý keńesiniń otyrysynda QR Eńbek jáne halyqty áleýmettik qorǵaý ministri Birjan Nurymbetov múgedekterdiń ómir súrý sapasyn jaqsartý boiynsha atqarylyp jatqan jumystar týraly baiandady.
Al QR eńbek jáne halyqty áleýmettik qorǵaý vitse-ministri Erlan Áýkenov «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» zań jobasyn tanystyrdy.
Sharaǵa ortalyq memlekettik organdardyń ókilderi, QR Parlamenti Májilisiniń depýtattary, balalar jáne adam quqyqtary jónindegi ombýdsmender Arýjan Sain men Elvira Ázimova, «Nur Otan» partiiasy janyndaǵy otbasy, áielder jáne balalardyń quqyqtaryn qorǵaý jónindegi respýblikalyq qoǵamdyq keńestiń tóraiymy Dinara Zákieva, múgedektigi bar adamdardyń qoǵamdyq birlestikteriniń ókilderi qatysty.
«Búgin Úilestirý keńesiniń 80% jańartylǵan jańa quramy jinaldy. Oǵan 40 adam kiredi, onyń 43%-y nemese 2/3 bóligióńirlik úilestirý keńesterinde sailanǵan múgedektigi bar adamdar. Alǵash ret Úilestirý keńesiniń 10 múshesi nemese25%-y internet-daýys berý arqyly sailandy. Daýys berýge 22 myńnan astam adam qatysty. Bul tiisti máselege qoǵamnyń keń qyzyǵýshylyǵy baryn taǵy bir márte dáleldedi», - dedi Eraly Toǵjanov Úilestirý keńesiniń otyrysyn ashqan kezde.
QR Premer-ministriniń orynbasary, aǵymdaǵy jyly Úkimet múgedektigi bar tulǵalardy áleýmettik qorǵaýǵa 435 mlrd teńge bólgenin, kelesi jyly qarjylandyrý 457 mlrd teńgege deiin ósetinin atap ótti.
Eńbek jáne halyqty áleýmettik qorǵaý ministri jáne vitse-ministri, densaýlyq saqtaý, bilim jáne ǵylym, indýstriia jáne infraqurylymdyq damý, aqparat jáne qoǵamdyq damý vitse-ministrleri kezdesýge qatysýshylardy múgedekterdiń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deiingi ulttyq jospardy iske asyrý barysynan habardar etti.
Máselen, Birjan Nurymbetov, Qazaqstanda 705,5 myń múgedektigi bar adam turatynyn, onyń 430,4 myńy nemese 61%-y eńbekke qabiletti jastaǵy azamattar ekenin jetkizdi. Olardyń tek tórtten bir bóligi ǵana jumysqa tartylǵan, al EYDU elderinde bul kórsetkish 40%-dy quraidy.
«QR Eńbek jáne halyqty áleýmettik qorǵaý ministrligi 2025 jylǵa deiin jumyspen qamtylǵan múgedektigi bar adamdardyń úlesin 30%-ǵa deiin arttyrýdy josparlap otyr. Ol úshin «Eńbek» nátijeli jumyspen qamtýdy jáne jappai kásipkerlikti damytýdyń memlekettik baǵdarlamasynyń áleýeti jumyspen qamtý, kásipkerlik negizderine oqytý jáne áleýmettik kásipkerlikti damytý turǵysynan paidalanylady. Tek ótken jyly 16,3 myńnan astam múgedektigi bar adam jumyspen qamtyldy, 2,2 myńy kásipkerlik negizderine oqytyldy, 1 236 grant jáne 672 mikrokredit berildi», - dedi ministr.
Sondai-aq, respýblikada túrli kompaniialardyń qoldaýymen úkimettik emes uiymdar múgedekterdi jańa daǵdylarǵa, onyń ishinde onlain rejimde úiretý boiynsha jobalardy belsendi túrde júzege asyrýda.
«Budan basqa, «Damý» qorymen birge akseleratsiia, aýqymdy keńeitý, biznes-tálimgerlik, oqytý, jańa naryqtarǵa shyǵýǵa járdemdesý jáne taǵy basqa baǵyttardy qamtityn qarjylyq emes qoldaý kórsetý úshin «scale-up» baǵdarlamasy aiasynda bizneste júrgen nemese isin jańadan bastaǵan múgedektigi bar adamdardyń 75 jobasy iriktep alyndy», - dedi Birjan Nurymbetov.
Ministrdiń aitýynsha, múgedekterge arnalǵan mamandyq tańdaýdyń shekteýli bolýyna bailanysty Qazaqstanda alǵash ret BUUDB-men birlesip, múmkindikteri shekteýli jandarǵa arnalǵan Mamandyqtar atlasyn ázirleý boiynsha joba júzege asyrylýda. Bul jumys berýshilerge, jumyspen qamtý ortalyqtaryna jáne HR salasyndaǵy jeke agenttikterge shekteý túrine bailanysty qolaily bos jumys oryndaryn usynýǵa múmkindik beredi.
«Atlasta organizm fýnktsiialarynyń buzylý túrlerine bailanysty múgedektigi bar adamdardy jumysqa ornalastyrý boiynsha usynystar bolady. Bos jumys oryndaryn tańdaý protsesin avtomattandyrý úshin osy Atlasty «Enbek.kz» elektrondyq eńbek birjasymen integratsiialaý josparlanyp otyr», - dedi Birjan Nurymbetov.
Keńes barysynda eńbek jáne halyqty áleýmettik qorǵaý vitse-ministri Erlan Áýkenov «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» zań jobasyn tanystyrdy.
Qujat «Halyq únine qulaq asatyn memleket» tujyrymdamasy aiasynda, úkimettik emes jáne halyqaralyq uiymdardyń qatysýymen, Senat janyndaǵy jumys tobynyń usynystaryn eskere otyryp ázirlendi. Zań jobasyn qabyldaýdyń maqsaty – múgedektigi bar adamdarǵa qatysty zańnamadaǵy kemsitý sipaty bar terminderdi joiý, olardy áleýmettik qorǵaý sharalaryn kúsheitý jáne jumyspen qamtylýyn yntalandyrý.
Negizgi jańalyq - Múgedekterdiń quqyqtary týraly konventsiianyń talaptaryna sáikes, «múgedek» terminin «múgedektigi bar adam» dep ózgertý.
Únemi kútimdi qajet etetin I toptaǵy múgedekterdiń quqyǵyn qorǵaý úshin osy sanattaǵy azamattarǵa qamqorlyq jasaityn adamdarǵa arnalǵan járdemaqy engizý kózdelgen. Jeke kómekshi qyzmetin kórsetý tásilderi qaita qaralady.
«Múgedektegi bar adamdardyń usynystaryn eskere otyryp, 2023 jyldan bastap «Invataksi» qyzmetin Áleýmettik qyzmetter portalyna aýystyrý josparlanyp otyr. Munda azamattar óz betinshe qyzmetti tańdap, yńǵaily mobildi qosymshalar arqyly taksige tapsyrys bere alady», - dep habarlady QR eńbek jáne halyqty áleýmettik qorǵaý vitse-ministri.
Sonymen qatar, otyrys barysynda turǵyn úimen qamtamasyz etý, múgedektiktiń aldyn alý, múmkindikteri shekteýli balalarǵa keshendi túrde kómek kórsetý, inkliýzivti bilim berýdi jetildirý jáne taǵy basqa máseleler qaraldy.
Kezdesý sońynda Eraly Toǵjanov ortalyq memlekettik jáne jergilikti atqarýshy organdarǵa Ulttyq jospardyń ýaqtyly jáne sapaly oryndalýyn qamtamasyz etýdi, zań jobasyn qoǵam pikirin eskere otyryp ázirleýdi tapsyrdy.
