Qazaqstanda monitoring toptarynyń jumysynyń jańa algoritmi bekitildi. Bul týraly tolyǵyraq Qazaqstan Respýblikasy kásipkerleriniń quqyqtaryn qorǵaý jónindegi ýákili Rústem Júrsinov Facebook paraqshasynda jazdy, dep habarlaidy "Ult aqparat".
«Bizdiń barlyq usynysymyz enbese de, keibiri algoritmniń sońǵy mátinine kirdi. Basqa da usynystardy Densaýlyq saqtaý ministrligi qoldap otyr. Algoritmniń mazmuny týraly negizgi jańashyldyqtardy aityp bereiin», - dep jazdy Rústem Júrsinov.
Onyń aitýynsha birinshiden, monitoring toptaryn jergilikti atqarýshy organdar jasaqtaidy. Onyń quramyna ákimdiktiń, politsiianyń jáne basqa da múddeli taraptardyń ókilderi kiredi. Olardyń maqsaty - koronavirýs infektsiiasynyń taralý qaýpiniń týyndaýyna jol bermeý, epidemiiaǵa qarsy jáne sanitarlyq-profilaktikalyq sharalardyń júrgizilýin baqylaý, shekteý sharalaryn zańdy jáne jeke tulǵalardyń saqtaýyn baqylaý.
«Ekinshiden, monitoring toptarynan tártip nemese ereje buzýshylyqtar týraly málimet alatyn jáne Kásipkerlik kodeks sheńberinde tolyqqandy tekserý júrgizý úshin shuǵyl habarlamalardy sanitarlyq-epidemiologiialyq qyzmetke (SEQ) jedel jiberetin Úilestirý beketteri jumys isteidi. Úshinshiden SEQ sanitarlyq-epidemologiialyq baqylaýǵa jatatyn nysandarǵa qatysty tekserý júrgizedi. Tórtinshiden SEQ sanitarlyq erejeler óreskel túrde buzylǵan jaǵdaida prokýratýraǵa habar beredi. Bul jerde áńgime Ákimshilik kodekstiń 425-baby týraly bolyp otyr. Al sanitarlyq talaptardy qaita-qaita buzatyndardyń jumysyn toqtatýǵa deiingi shara qabyldanady. Biraq bul rette eskertýdi elemegenderdiń ǵana jumysy toqtatylatynyn aita ketý kerek», - deidi ol.
Rústem Júrsinovtyń habarlaýynsha besinshiden ákimshilik jaýapkershilik tek baqylaý paraǵynda kózdelgen tártip buzýshylyqtar úshin taǵaiyndalýy múmkin (24 pýnkt boiynsha, qazir olardyń sanyn 20-ǵa deiin azaitý kózdelgen).
«Dostar, qarapaiym tilmen aitqanda Kásipkerlik kodeks sheńberindegi tekserý institýty keńirek qoldanylady. Bul durys rettelgen júie. Alaida qazirgi ýaqytta monitoring toptary júrgizip jatqan baqylaý jumystary esh toqtamaidy. Sanitarlyq-epidemiologiialyq baqylaý komiteti, Densaýlyq saqtaý jáne Ishki ister ministrlikteri ózara kelise otyryp, monitoring toptarynyń tekseristeri tek óreskel buzýshylyqtarǵa baǵyttalýy kerek degen sheshimge kelip otyr. Atap aitqanda ol toptar nysan jumysynyń rejimi buzylsa, kelýshilerdiń sany artqan jaǵdaida, tyiym salynǵan nysandardyń jumysyn qadaǵalaýǵa, maska rejiminiń saqtalmaýyna qatysty tekseris júrgizedi», - deidi ol.
