Qazaqstanda memlekettik organdarǵa júginýdiń biryńǵai platformasy iske qosylady. Bul týraly QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev málimdedi, dep habarlaidy QazAqparat.
«Tsifrlandyrý aiasynda memleketimizdiń basty mindetteriniń biri – azamattardyń zańdy múddeleri men quqyqtaryn barynsha júzege asyrýǵa kómektesý máseleleri tur. Birinshiden, memlekettik organdarmen ashyq jáne aiqyn dialog mehanizmi – azamattardyń quqyqtaryn iske asyrýdyń negizgi quraldarynyń biri. Bul úshin elimizde «elektrondyq úkimet» veb-portaly jáne memorgan basshylarynyń blog-platformasy arqyly ótinishterdi elektrondy túrde berýge bolady. Biryńǵai elektrondy ótinish berý platformasy iske qosylýǵa daiyn, bul azamattarǵa óz ótinishterin tezirek jiberýge, sonymen qatar olardyń qaralý barysyn baqylaýǵa múmkindik beredi. Kásipkerlerge arnalǵan «Qamqor» mobildi qosymshasy kásipkerge ózin zańsyz tekserýlerden qorǵaýǵa, inspektorlardyń zańsyz áreketteri týraly shaǵym túsirýge jáne tekserý nátijelerimen onlain túrde tanysýǵa múmkindik beredi», - dedi Asqar Jumaǵaliev «Tsifrlyq órkeniet dáýirinde memleket pen qoǵamnyń transformatsiialanýyndaǵy Konstitýtsiianyń róli» atty dóńgelek ústelde.
Sonymen birge, ministr memlekettik organdardyń derekter bazasyndaǵy azamattar týraly aqparatty talap etýge tyiym salý qajettigin aitty.
«Sáikes zańnamalyq baza daiyndalyp jatyr. Azamattarǵa mekenjai anyqtamasyn, múliktiń jáne sottylyǵynyń joqtyǵy týraly anyqtamalardy elektrondy túrde berip, memlekettik organdar men ózge de uiymdarda tanylýyn josparlap otyrmyz. Bul jumystar jalǵasyp jatyr, ótken jyly 8,5 mln anyqtama halyqtan talap etilgen joq. Sondai-aq, 70 mln astam osyndai anyqtama qujattar ainalymynan alyp tastaý josparlanǵan», - dedi Asqar Jumaǵaliev.
