Qazaqstanda genderlik jáne otbasylyq saiasatty tiimdi iske asyrý máseleleri pysyqtalady. Bul týraly QR Aqparat jáne qoǵamdyq damý ministrligi Jastar jáne otbasy isteri komitetiniń tóraǵasy Shahmardan Baimanov aityp berdi, dep habarlaidy QazAqparat.
Onyń aitýynsha, «Qazaqstandyq otbasylar-2020», «QR-daǵy otbasylyq-turmystyq zorlyq-zombylyqqa qarsy is-qimyl týraly», «QR-daǵy balalardyń jaǵdaiy týraly» jáne basqa da áleýmettik, saraptamalyq zertteýlerdi, otbasy ómirine pandemiianyń áserin eskerip, statistikalyq jáne taldamalyq aqparatty jańartý kózdelgen.
«2030 jylǵa deiingi otbasylyq jáne genderlik saiasat tujyrymdamasy eki negizgi baǵytty qamtidy. Otbasy saiasaty boiynsha negizgi basymdyqtar: Otbasy qundylyqtary men dástúrlerin, urpaqtar sabaqtastyǵynyń saqtalýyn balabaqshalar men mektepterde otbasylyq tárbie boiynsha oqytý baǵdarlamalary arqyly nasihattaý jumystary kúsheitiledi; Otbasyn qoldaý, otbasy daýlaryn sheshý men balaly áielderge ýaqytsha turatyn ortalyqtardy qurýǵa josparlanǵan. Ortalyqtar qyzmetiniń erejesi, memlekettik organdardyń ózara is-qimyl algoritmi ázirlenedi. Qazaqstandaǵy otbasylardyń jaǵdaiyna jan-jaqty zertteý júrgizý maqsatynda otbasylyq saiasat problemalaryn zerdeleý jalǵasady», - dedi Sh. Baimanov Aqparat jáne qoǵamdyq damý salasyndaǵy Qoǵamdyq keńes otyrysynda.
Sonymen birge Memleket basshysy óz Joldaýynda qoǵamda áielderdi ekonomikalyq jáne saiasi qoldaýdy qamtamasyz etýge nazar aýdarǵan edi. Osyǵan bailanysty genderlik saiasat salasy boiynsha kelesi basym baǵyttardy aiqyndaý josparlanýda.
«Birinshiden, memleket qatysatyn kompaniialardyń basshy organdaryndaǵy áielder úlesin 30%-ǵa deiin arttyrý máselesi qosymsha pysyqtalady. Ekinshiden, genderlik biýdjetteýdi engizý jumystary jalǵasady. Úshinshiden, BUU Áielderge qatysty kemsitýshilikti joiý komitetiniń áielderge qatysty kemsitýshiliktiń barlyq nysandaryn joiý týraly konventsiiany oryndaý jónindegi Qazaqstannyń besinshi merzimdi baiandamasy boiynsha usynystary eskeriledi. Tórtinshiden, Tujyrymdamanyń maqsattary men indikatorlaryn 2030 jylǵa deiingi Ornyqty damý salasyndaǵy maqsattarmen jáne kún tártibiniń indikatorlarymen úilestirý usynylady», - dedi Sh. Baimanov.
Besinshiden, Genderlik jáne otbasylyq saiasatty tiimdi iske asyrý úshin biýdjettiń turaqty bólinýin jáne ulttyq, óńirlik, jergilikti jáne salalyq deńgeilerde genderlik máseleler boiynsha quzyretti mamandar men zańgerler daiarlaýdy kózdelmek. Altynshydan, óńirler, qalalar jáne aýdandar bólinisinde jumyspen qamtý, bazalyq áleýmettik kórsetiletin qyzmetterge, memlekettik qoldaýdyń túrli sharalaryna qol jetkizý bóliginde genderlik muqtajdyqtar men qajettilikter kartasyn ázirleý josparlanǵan.
«Tujyrymdamany ózektendirýdiń negizgi maqsaty qazirgi qoǵamdaǵy ózekti máselerdi eskerip, otbasy institýtyn nyǵaitýǵa, otbasy qundylyqtaryn dáripteýge, ajyrasý men otbasylyq-turmystyq saladaǵy quqyqbuzýshylyqtardy azaitýǵa, kópbalaly otbasylardyń problemalyq máselelerin júieli sheshýge jáne áielderdiń qoǵamdaǵy ekonomikalyq jáne saiasi ustanymdaryn keńeitýge baǵyttalady. Qazirgi tańda tujyrymdamany ózektendirý boiynsha jumys toby qurylyp jatyr. Jumys toby quramyna Parlament depýtattary, QR Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiia músheleri, sarapshylar, úkimettik emes, halyqaralyq uiymdardyń jáne múddeli memlekettik organdardyń ókilderi kirdi. Sonymen qatar, halyqaralyq uiymdar da, onyń ishinde «BUU-áielder» qurylymy, IýNISEF, IýNFPA genderlik saiasat baǵyty boiynsha usynystaryn bildirdi», - dep túsindedi Sh. Baimanov.
