QR Memlekettik qyzmet isteri agenttigi memlekettik qyzmetshilerge tilderdi meńgerý boiynsha talaptar belgileý máselesin pysyqtaýda. Bul jaiynda Májilis depýtattarynyń saýalyna QR Premer-Ministriniń jaýabynda aitylǵan, dep habarlaidy "Ult aqparat".
«Qazaqstan Respýblikasynyń Memlekettik qyzmet isteri agenttigi memlekettik qyzmetshilerge tilderdi meńgerý boiynsha talaptar belgileý máselesin pysyqtaýda. Qazirgi tańda «Azamattarǵa arnalǵan úkimet» memlekettik korporatsiiasy» kommertsiialyq emes aktsionerlik qoǵamy qyzmetkerlerine qoiylatyn biliktilik talaptaryna sáikes, halyqqa qyzmet kórsetý ortalyqtary qyzmetkerlerine qazaq tilin bilý mindettelgen», - dedi Úkimet basshysy.
Onyń atap ótýinshe, «Qazaqstan Respýblikasyndaǵy til týraly» Zańnyń 9-babyna sáikes memlekettik organdardyń aktileri memlekettik tilde ázirlenip, qabyldanady. Osyǵan orai búginde Zań talaptaryna sáikes barlyq memlekettik normativtik quqyqtyq aktiler memlekettik tilde ázirlenýde. Memlekettik organdar daiyndaityn is qaǵazdardyń 93 paiyzy qazaq tilinde. Zańnyń 10-babyna sáikes Qazaqstan Respýblikasynyń memlekettik organdary júiesinde, uiymdarynda, menshik nysanyna qaramastan, statistikalyq-esep, qarjy jáne tehnikalyq qujattama júrgizý memlekettik jáne orys tilde qamtamasyz etiledi.
«Sonymen qatar, memlekettik tildiń qoldanys aiasyn keńeitýge baǵyttalǵan zańnamalyq jumystar júrgizilýde. Búginde «Qazaqstan Respýblikasynyń keibir zańnamalyq aktilerine kórneki aqparat máseleleri boiynsha ózgerister men tolyqtyrýlar engizý týraly» zań jobasy ázirlenip, Parlamenttiń qaraýyna engizildi. Zań jobasy derektemeler men kórneki aqparatty ornalastyrýda orfografiia normalaryn, mátinderdiń maǵynalyq jáne teń túpnusqalyq aýdarmasyn saqtaý talaptaryn keńeitýge múmkindik beredi», - dedi Premer-Ministr.
Asqar Mamin Qazaqstan Respýblikasy Prezidentiniń 2020 jylǵy 20 qarashadaǵy № 453 Jarlyǵyna sáikes tilderdi damytý salasyndaǵy fýnktsiialar men ókilettikter Bilim jáne ǵylym ministrligine berilgendigine nazar aýdartady.
«Bul qoǵamdyq qatynastardyń barlyq salalarynda memlekettik tildiń qoldanys aiasyn keńeitý jáne memlekettik tildi oqyp-úirenýge jaǵdai jasaý, qazaq tiliniń oqytý ádistemesin jetildirý jumystaryn bir ortalyqqa shoǵyrlandyrady, sondai-aq memlekettik tildiń damýyna oń yqpal etedi. Depýtattyq saýalda atalǵan usynystar Qazaqstan Respýblikasyndaǵy tilderdi damytý jónindegi memlekettik saiasatty iske asyrý barysynda qarastyrylatyn bolady. Memlekettik tildiń qoldanys aiasyn keńeitý jumystary Úkimettiń turaqty baqylaýynda, bul baǵyttaǵy jumystar jalǵasýda», - dedi ol.
