Qazaqstan kásiporyndary meditsinalyq maskalar shyǵara bastady. Bul týraly Saýda jáne integratsiia ministri Baqyt Sultanov málim etti, dep habarlaidy "Ult aqparat".
«Elimizde qorǵanysh maskalary men antiseptikalyq quraldar óndirisi ashylýda. TJ rejiminde jedel áreket etý qajet bolǵan kezde naryqqa kirý de jyldam júzege asyrylady. Óte jedel. Bizdiń Tehnikalyq retteý jáne metrologiia komiteti Ulttyq akkreditteý ortalyǵymen jáne Qazaqstan standarttaý institýtymen birlesip qysqa merzim ishinde «Qorǵanysh maskalary. Tehnikalyq talaptar» ulttyq standartyn ázirledi. Qajetti synaqtar ótkizilip, 1 mln danadan astam qorǵanysh maskalary sertifikattaldy», - dep jazdy ministr Facebook-paraqshasynda.
Sondai-aq atap ótilgendei, Qazaqstanda dezinseptikter óndirisin jolǵa qoiý josparlanyp otyr.
«Dezinfektsiia jáne dezinsektsiia quraldary (turmysta jáne emdeý-aldyn alý mekemelerinde qoldaný úshin) memlekettik tirkeýdi Densaýlyq saqtaý ministrligi júzege asyrady. Saýda ministrligi Densaýlyq saqtaý ministrligimen kelisimge keldi. Ol úshin Densaýlyq saqtaý ministrligi janyndaǵy Sanitarlyq-epidemiologiialyq saraptama jáne monitoring ǵylymi-praktikalyq ortalyǵy jedel tártippen qajetti zerthanalyq zertteýler júrgizedi («beibit» jaǵdaida tiisti 3 ai emes, bir ai ishinde). Sodan keiin Densaýlyq saqtaý ministrligi bir kún ishinde memlekettik tirkeý týraly qujat berýge daiyn. Iá, bir ai – bul da qysqa merzim ekenin túsinemiz. Biraq zertteýsiz qaýipti bolýy múmkin dezinfektsiialaý quraldaryn qoldanysqa jiberýge de quqymyz joq! Óz qujattary men úlgilerin saraptamaǵa SQO-dan turmystyq himiia ónimderin óndirý tájiribesi bar «Radýga» JShS jiberdi. Olar elimiz úshin kúrdeli jaǵdaida antiseptikterdi daiyndaýǵa kóshti», - dedi B.Sultanov.
Budan bólek, Qazaqstannyń avtohimiia ónimderin óndirýshiler men tutynýshylar qaýymdastyǵy óz óndirisin elde suranysqa ie antiseptikter men dezinfektsiialaýshy quraldardy shyǵarýǵa qaita beiindeýge daiyn. Olar muqtaj adamdarǵa tegin jetkizýge daiyn.
