Mashina jasaý salasyn damytýdy kózdeitin, 2019-2024 jyldarǵa arnalǵan Jol kartasy boiynsha qazaqstandyq mashina jasaýshy jáne quraýshy kásiporyndarǵa birqatar jeńildikter men basymdyqtar berilgeli otyr. Bul týraly Nur-Sultanda ótip jatqan Qazaqstan mashina jasaýshylarynyń VII forýmynda Indýstriia jáne infraqurylymdyq damý ministri Amaniiaz Erjanov aityp berdi, dep habarlaidy QazAqparat.
«Kórshi Resei memleketi avtoóndirýshi kásiporyndarǵa basa mańyz berip, olarǵa salyqtyq jeńildikter berip qoiǵan. Máselen, onda jolaýshylarǵa arnalǵan mashinalardy jasaýshylar qosymsha qun salyǵynan bosatylǵan. Osy jeńildikter men memlekettik qoldaýǵa qaitarym retinde reseilik kásiporyndardyń ózindik mindeti de barshylyq. Kórshi eldiń tájiribesin eskere otyryp, mashina jasaýshylardy qoldaýǵa arnalǵan Jol kartasyn qabyldadyq. Atlamysh qujat kelesi jeńildikterdi qarastyrǵaly otyr: birinshiden, mashina jasaityn kásiporyndarǵa salyqtyq jeńildikter beriledi. Buǵan qaitarym retinde kásiporyndarǵa mindettemeler júkteledi. Bul baǵyttaǵy qadam salaǵa jańa investorlardy tartyp, óndiris kólemine qosymsha 80-100 mlrd teńgelik ósimdi qamtamasyz etedi», - dedi vitse-ministr.
Amaniiaz Erjanov sondai-aq, salany keshendi túrde damytý úshin arnaiy «Ónerkásiptik saiasat jáne ónerkásiptik damý qoryn qurý týraly» zań jobasy ázirlenetinin atap ótti.
«Atalǵan sharalar júrgizilip jatqan ónerkásiptik saiasattyń tiimdiligin arttyrýǵa múmkindik beredi. Úshinshiden, shikizattan daiyn ónimge deiingi naqty óndiristik qatardy qalyptastyrýǵa kúsh salý kerek. Osy rette reseilik tájiribe boiynsha otandyq kásiporyndardy QQS-tan bosatý jáne olarǵa shikizatty arzan baǵamen berý ádisin engizgen jón bolady», - dedi ol.
Eske sala ketsek, Nur-Sultanda Qazaqstan mashina jasaýshylarynyń VII forýmy ótip jatyr. Forýmdy QR Indýstriia jáne infraqurylymdyq damý ministrligi men Qazaqstan mashina jasaýshylar odaǵy, «Samuryq-Qazyna» UÁQ» AQ uiymdastyrǵan. Biyl forým «Mashina jasaý – Qazaqstandy indýstriialandyrý draiveri» uranymen ótedi.
Jyl saiyn forýmǵa Germaniia, AQSh, Japoniia, Italiia, Chehiia, Resei, Qytai sekildi iri 20 memlekettiń delegattary qatysady. Osylaisha, otandyq kásiporyndar elden shyqpai-aq sheteldik áriptesterimen kezdesý ótkizýge múmkindik alady.
