Eldiń barlyq óńirindegi Mamandandyrylǵan halyqqa qyzmet kórsetý ortalyqtary jumysyn ýaqytsha toqtatty. "Ult aqparat" bul týraly Polisia.kz saityna silteme jasap habarlaidy.
«Búgin QR Ishki ister ministrligi Ákimshilik politsiia komitetiniń jáne QR Tsifrlyq damý, innovatsiialar jáne aeroǵarysh ónerkásibi ministrligine qarasty «Ulttyq aqparattyq tehnologiialar» AQ-nyń aqparattyq júieleri arasynda irkilis boldy. Saldarynan el boiynsha Mamandandyrylǵan halyqqa qyzmet kórsetý ortalyqtary turǵyndarǵa qyzmet kórsete almai, jumysyn ýaqytsha toqtatty. IIM Ákimshilik politsiia komitetiniń jáne «Ulttyq aqparattyq tehnologiialar» AQ mamandary júiedegi aqaýdy joiýdy jalǵastyrýda. Jumystar qalpyna keltirilgeni jóninde qosymsha habarlaityn bolamyz», - delingen taratylǵan aqparatta.
