Búgin Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýyn júzege asyrý boiynsha atqarylǵan jumystar qorytyndysy boiynsha aýyl sharýashylyǵy birinshi vitse-ministri Qairat Aitýǵanov AÓK damytýdyń memlekettik baǵdarlamasynyń alǵashqy nátijeleri týraly baiandady, - dep habarlaidy "Ult aqparat".
Biylǵy jyldyń I toqsanynda aýyl sharýashylyǵynyń jalpy ónim kólemi ótken jyldyń osy kezeńimen salystyrǵanda jospardaǵy 2,5% jaǵdaiynda 2,9% artyp, 353,7 mlrd teńgeni qurady. Bul oraida mal sharýashylyǵy ónimderiniń óndirisi 3% artty, kólemi - 340 mlrd teńgege jýyq. Aýyl sharýashylyǵyna investitsiialar kólemi 22% artqan.
Atalǵan kezeńde azyq-túlik ónimderin óndirý 3,4% artqan. Mal sharýashylyǵy salasynda orta eseppen mal basynyń 3,1% artýy, et óndirisi - 3,8%, sút óndirisi- 3,6% artýy baiqaldy.
I toqsanda 182 aýyl sharýashylyǵy kooperativi quryldy. Jalpy, bir jyl ishinde 130 myń jeke qosalqy sharýashylyqtardy qamtýmen aýyl sharýashylyǵy kooperativteriniń sanyn 467-ge deiin jetkizý kózdelip otyr.
AÓK damytýdyń memlekettik baǵdarlamasyn júzege asyrý aiasynda Tehnologiialar transferti ortalyǵy quryldy, onda 500-ge jýyq ozyq tehnologiialardyń málimetter bazasy bar. Sonymen qatar, «Azyq-túlik korporatsiiasy» AQ bazasynda sheteldik naryqta otandyq aýyl sharýashylyǵy ónimderin ilgeriletý boiynsha eksport ortalyǵy quryldy.
Birinshi vitse-ministrdiń aitýynsha, biyl ónim túsimin arttyrýǵa, salmaq túsimi men óńdeýshi kásiporyndardyń júktemesin kóbeitýge basa nazar aýdarý men aýyl sharýashylyǵy taýarlaryn óndirýshilerdi sýbsidiialaý kriterileri ózgertildi. Bul negizinen shaǵyn jáne ortasha sharýa qojalyqtarynyń sýbsidiia alýǵa tilek bildirýshileriniń sanynyń birneshe esege artýyna jol ashty.
«Kóktemgi egis jumystaryn ýaqytyly júrgizý maqsatynda egis jumystaryn nesielendirý jáne egis naýqanyn janar-jaǵarmai materialdarymen qamtamasyz etý máseleleri sheshilip jatyr. 2017 jyly kóktemgi egis jáne ónimdi jinaý jumystaryn qarjylandyrýǵa 60 mlrd teńge kólemindegi biýdjettik nesie bólindi, qazir onyń 33 mlrd teńgeden astamy igerilgen. Bul tusta nesie boiynsha syiaqy mólsherlemesi jylyna 6%-dan artyq emes», - dedi Q.Aitýǵanov.
