QR Qarjy naryǵyn retteý jáne damytý agenttigi Qazaqstanda litsenziialanbaǵan kompaniialardyń tizbesin jariialady, dep habarlaidy "Ult aqparat" vedomstvo saityna silteme jasap.
2020 jyldan bastap, agenttikke joǵary kiristilik kepildigine ýáde bere otyryp, klientterdiń aqshasyn investitsiialyq maqsattar úshin tartatyn litsenziialanbaǵan kompaniialardyń qyzmeti máseleleri boiynsha 40-tan astam shaǵym men ótinish kelip túsken.
«Osyndai kompaniialar kóp jaǵdaida offshorlyq aimaqtarda tirkelgen jáne olardyń qarjy retteýshisiniń qarjy naryǵyndaǵy qyzmetti júzege asyrýǵa arnalǵan litsenziiasy joq. Olar klientterge konsýltatsiia berýdi usynady jáne óz servisteri arqyly qarajatty investitsiialaý boiynsha oqytý júrgizedi. Qazaqstan aýmaǵynda atalǵan kompaniialar negizinen qashyqtan, ókildikter men filialdar, ne senimhat boiynsha ókilder arqyly jumys isteidi», delingen habarlamada.
Agenttiktiń túsindirýinshe, bul uiymdardyń jumys isteý shemasy klientke shetel valiýtasymen jáne ózge de qarjy quraldarymen operatsiialar jasaý úshin jabyq internet servisterge jáne saýda platformalaryna qashyqtan kirý beriletinin boljaidy. Mundai platformalarda klientter ózderiniń jeke kabinetinde óz qarajatynyń «ulǵaiýyn» baiqaýy múmkin. Klient «tapqan» kirisin alýǵa áreket jasaǵan kezde, bul kompaniialar aqshany qaitarǵany úshin qosymsha syiaqy talap ete otyryp klientke onyń aqshasyn qaitarýdan jaltarady, ne qandai da bir sebeptermen klientterdiń shottarynyń negizsiz «kúshin joiady», bul da alaiaqtyq áreketter belgisine ie.
«Osyndai kompaniialardyń bank salymdary boiynsha syiaqynyń aǵymdaǵy mólsherlemesinen kóp asatyn joǵary paidany ýáde ete otyryp, óz qyzmetterin negizinen áleýmettik jeli arqyly agressivti túrde jarnama jasaitynyna nazar aýdarǵan jón.
Osyǵan bailanysty, agenttik Qazaqstan azamattaryn agressivti jarnamaǵa berilmeýge shaqyrady jáne túsinikti ári aiqyn quqyqtyq rejimi bar kompaniialarmen jumys isteýge usynym beredi», delingen habarlamada.
Ýákiletti organnyń QR baǵaly qaǵazdar naryǵynda qyzmetpen ainalysýǵa litsenziialary bar brokerlik/dilerlik uiymdardyń tizimi agenttiktińsaityndaornalastyrylǵan.
Atalǵan kompaniialardyń qyzmeti Qazaqstan Respýblikasynyń zańnamasynda qatań túrde reglamentteledi. Agenttik oiynshylardyń qyzmetin baqylaý men qadaǵalaýdy júzege asyrady jáne bul kompaniialardyń qyzmetin tutynýshylardyń quqyǵy men zańdy múddesin qorǵaýdyń tiisti deńgeiin qamtamasyz etedi.
«Litsenziialanbaǵan kompaniialardyń qyzmetine bailanysty azamattardyń táýekelderin boldyrmaý úshin agenttik azamattardyń shaǵymdary kelip túsken kompaniialardyń tizbesi men saittaryn jariialady. Sonymen birge agenttik ózderin «investitsiialyq kompaniialar» retinde kórsetetin uiymdarmen sharttyq qatynastarǵa túsken kezde IOSCO halyqaralyq Baǵaly qaǵazdar jónindegi komissiialardyń halyqaralyq uiymynyń habarlamasy jáne eskertýimen tanysýdy usynady.
Sonymen qatar qarjy quraldarymen saýda-sattyq jasaýdyń túrli naryqtyq, kredittik, valiýtalyq táýekeldermen qatar júretinin este ustaǵan mańyzdy. Osyǵan orai, investorlarǵa investitsiialardy litsenziialanǵan qazaqstandyq kompaniialar arqyly júzege asyrýdy usynym beremiz», delingen habarlamada.
