COVID-19 koronavirýs infektsiiasyn diagnostikalaý jáne emdeý klinikalyq hattamasyna tolyqtyrýlar engizildi. Bul týraly QR Densaýlyq saqtaý vitse-ministri Liýdmila Biýrabekova Facebook-paraqshasynda jazdy, – dep habarlaidy «Ult aqparat».
«COVID-19-dy diagnostikalaý jáne emdeý klinikalyq hattamasynyń 10-redaktsiiasyna koronavirýs infektsiiasyn emdeýde aitarlyqtai tolyqtyrýlar engizildi. COVID-19 kezinde bakteriiaǵa qarsy terapiiany bakteriialyq infektsiia qosylǵan jaǵdaida ǵana qoldanýǵa basa nazar aýdaryldy. COVID-19 kezinde ókpeniń virýspen zaqymdanýy empirikalyq bakteriiaǵa qarsy terapiiany bastaý úshin kórsetkish bola almaidy», - dedi vitse-ministr.
Onyń atap ótýinshe, hattamany ázirleýshiler COVID-19-dyń aýyrlyq deńgeii ortasha naýqastarǵa virýsqa qarsy preparattardy statsionarǵa jatqyzǵanǵa deiin ambýlatorlyq jaǵdaida qoldaný usynysyn quptaǵan. Bul úshin hattamaǵa ambýlatorlyq kezeńde emdeý syzbasy qosylyp otyr: gidroksihlorohin jáne Lopinavir/ritonavir.
«Buǵan qosa, endigi ýaqytta patsientter statsionar deńgeiinde Japoniia men Reseide COVID- 19-dy emdeýde keńinen qoldanylǵan Favipiravir dárisin ala alady. Pnevmoniianyń aýyr túrinde terapiia deksametazon preparatymen tolyqtyryldy», - dedi Liýdmila Biýrabekova.
Vitse-ministrdiń atap ótýinshe, sondai-aq patsienttiń dene qyzýy 3 táýlikten astam ýaqyt bolmasa, respiratorlyq simptomdar azaisa, rengendik kompiýterlik tomografiia barysynda ókpede oń dinamika baiqalsa jáne basqa da oń ózgerister kezinde naýqas ambýlatorlyq emdeýge aýystyrylady. Aýrýdyń ortasha jáne aýyr túrin bastan keshirgen rekonvalestsentter statsionardan jazylyp shyqqannan keiin meditsinalyq baqylaý úi jaǵdaiynda jalǵasatyn bolady. Baqylaý ýaqyty rekonvalestsenttiń jalpy jaǵdaiyna bailanysty derbes anyqtalady. Hattamanyń 10-nusqasy taiaý ýaqytta Densaýlyq saqtaý ministrliginiń resmi saitynda jariialanady.
