Qazaqstanda koronavirýs infektsiiasyn juqtyrǵan adamdardy emdeý hattamasyna jańa shema engizildi. Bul týraly Densaýlyq saqtaý vitse-ministri Liýdmila Biýrabekova málim etti, dep habarlaidy QazAqparat.
«Qazirgi ýaqytta koronavirýs infektsiiasy boiynsha epidemiologiialyq jaǵdai kúrdelenip barady. Aýrýdyń belgisi joq kúiinde de, belgisi aýyr kúiinde de tirkelip jatqandar artýda. Buǵan qosa dári-dármekpen qamtamasyz etý problemasy da ózekti bolyp tur. Naqtyraq aitqanda keibir preparat bólshektik saýda ainalymynan joǵalyp ketti», - dedi vitse-ministr OKQ-da ótken baspasóz máslihatynda.
Óz sózinde Liýdmila Biýrabekova koronavirýs juqtyrý jaǵdaiy boiynsha eldegi sońǵy málimetterdi jariia etti.
«Qazirgi tańda koronavirýs juqtyrǵan naýqastar KVI-di diagnostikalaý men emdeý hattamasyna sáikes emdelip jatyr. Bul qujat Densaýlyq saqtaý ministrliginiń sapa boiynsha birlesken komissiiasymen osy jyldyń qańtar aiynda ázirlenip, bekitilgen bolatyn. Halyqaralyq deńgeide jańa málimetterdiń túsýin jáne osy ýaqytqa deiin tájiribeni eskere otyryp, bul qujat birneshe ret qaralyp, onyń sońǵy nusqasy eki kún buryn maquldandy. Qujatqa em-domnyń jańa shemasy – etiotropty em, virýsqa qarsy terapiia engizildi. Preparattardyń sany 4-ke artty. Qazirgi tańda lapinovir, retonovir qoldanysta. Ol em-dom shemasynda bolǵan. Al qujat boiynsha qazir hlorohin jáne gidroksihlorohin, rendisivir jáne Japoniia, RF-da keńinen qoldanysqa engizilgen faviaperavir engizildi», - dedi ol.
Vitse-ministr bul preparattardyń bári de tek statsionarlarda qoldanylatynyn jetkizdi.
«Klinikalyq tájiribeler arqyly sońǵy hattama maquldandy. Ambýlatoriialyq deńgeide lapinovir, retonovir jáne gidroksihlorohinmen emdeýge bolatyny týraly sheshim qabyldandy», - dedi ol.
