Qazaqstannyń alty óńirinde qurǵaqshylyq bolady dep kútiledi. "Qazgidromet" RMK sinoptikteri maýsymǵa jasaǵan boljamyn jariialady, - dep habarlaidy "Ult aqparat".
Meteorologtar málimeti boiynsha, ylǵaldaný jaǵdailarynyń statistikalyq boljamyna sáikes, maýsymda Qazaqstannyń biraz aýmaǵynda ylǵal jetkiliksiz bolady dep kútiledi.
"Aqmola (Jaqsy aýdany), Aqtóbe (Áiteke bi, Hromtaý aýdandary), Shyǵys Qazaqstan (Besqaraǵai aýdany) jáne Mańǵystaý oblysynda (Qaraqiia aýdany) qatty qurǵaqshylyq kútiledi. Tótenshe jaǵdai Shyǵys Qazaqstan oblysynyń Abai aýdanynda jáne Qostanai oblysynyń Amangeldi aýdanynda bolýy múmkin", - delingen habarlamada.
Eske salaiyq, buǵan deiin májilis depýtattary Qyzylorda jáne Mańǵystaý oblystarynda tótenshe jaǵdai engizýdi usynǵan bolatyn. Olardyń aitýynsha, bul óńirlerde mal azyǵyna qatysty jaǵdai óte qiyn. Onda ashtyqtan, tek resmi málimetter boiynsha, eki myńǵa jýyq mal ólgen.
Depýtattar úkimetti shuǵyl sharalar qabyldaýǵa shaqyrdy, sondai-aq agrosferadaǵy jetistikterge qaramastan, qarapaiym problemalar, onyń ishinde jem-shóppen qamtamasyz etý respýblikada áli kúnge deiin sheshilmegenin aitty.
