Qazaqstan musylmandary dini basqarmasy Qurban ait merekesine orai Qurban2020.kz saityn iske qosty, dep habarlaidy "Ult aqparat".
Buǵan deiin elimizdegi epidemiologiialyq ahýalǵa bailanysty qurban shalýǵa onlain túrde tapsyrys beretin saittyń ashylatyny týraly habarlanǵan bolatyn. Qazaq jáne orys tilderinde qyzmet kórsetetin jańa saittyń kómegimen el turǵyndary onlain túrde qurbandyq malyn tańdap, tólem jasap, keiin qalasa foto jáne beine esebin surata alady. Sondai-aq saitta qurban shalýǵa qatysty Shariǵat jáne pátýa bólimi mamandary daiyndaǵan suraq-jaýap ta bar.
Qurban shalýǵa onlain túrde qalai tapsyrys berýge bolatynyn saittyń ózine kirip bilýge bolady.
Eske sala ketsek, buǵan deiin Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly 31 shilde kúni Qazaqstan meshitterinde Qurban ait namazy oqylmaitynyn habarlaǵan edi.
«Elimizdegi karantin merzimi 2 tamyzǵa deiin uzartylǵandyqtan, respýblika boiynsha meshitter jabyq bolady. Osyǵan bailanysty 31 shilde kúni Qurban ait namazy oqylmaidy», - dedi Bas Múfti Ortalyq kommýnikatsiialar qyzmetinde.
Sonymen qatar Bas múfti onlain shalynǵan qurban etterin muqtajdarǵa taratýǵa volonterlerdi shaqyrdy.
