© Sputnik / Mýrad Orýdjev
Ishki ister ministri Erjan Sádenov qos azamattyq úshin qylmystyq jazany engizýge qatysty óz oiyn aitty.
Májilistiń búgingi otyrysynda qos azamattyq máselesi kóterildi. Depýtat Bolatbek Nájimedenulynyń aitýynsha, Qazaqstanda qos azamattyqty jasyryp júrgender az emes. Barlyǵy eki eldiń jeńildikterin paidalanyp júredi. Al ustalǵandarǵa kóbinese aiyppul ǵana salynady. Biraq olar shetelge qashyp, ákimshilik jaýapkershilikten jaltaryp ketedi.
"Ondai adamdar Qazaqstan azamaty retinde óz quqyqtaryn biledi, biraq mindetterin oryndamaidy. Ol - azamat emes, shamadany daiyn turǵan ýaqytsha rezident. Sondyqtan qos azamattyq úshin jaýapkershilikti qylmystyq jazaǵa deiin qatańdatý kerek. Al ishki ister ministrligi bul bastamany qoldaýǵa daiyn ba?", - dedi Nájimedenuly.
Ministr Erjan Sádenov "birlesip jumys isteýge daiyn" ekenin málimdedi.
"Jalpy, durys aitasyz, olardyń ishinde kriminal da, basqasy da bolýy múmkin. Sondyqtan biz talqylaýǵa daiynbyz. Ózderińiz bilesizder, árqashan sizderdiń usynystaryńyzdy qarap otyramyz. Bul ulttyq qaýipsizdik pen tynyshtyq máselesimen de tyǵyz bailanysty. Sol sebepti, árine, talqylaýǵa daiynbyz", - dedi ministr.
