Qazaqstanda qos azamattyǵy bar 284 adam anyqtaldy, dep habarlaidy "Ult aqparat" QR IIM baspasóz qyzmetine silteme jasap.
IIM Kóshi-qon qyzmeti memlekettik organdarmen birlesip, Qazaqstanda qos azamattyǵy úshin jaýaptylyqqa tartylǵan 284 burynǵy azamatty anyqtady.
«Azamattyǵynan aiyrylǵan adamdar bola tura, tártip buzýshylar Qazaqstan Respýblikasyna kelý jáne turý úshin qazaqstandyq qujattardy paidalandy. Olardyń birqatary shet memlekettiń azamattyǵyn qabyldaǵany týraly ýaqtyly habarlamaǵany úshin ákimshilik jaýapkershilikke tartyldy. Osy zań buzýshylyqtar úshin 266 adamǵa ( 277 800 teńgeden 555 myń teńgege deiin) aiyppul salynyp, 18 adam elden shyǵaryldy. Jaza taǵaiyndaý týraly sheshimdi sot organy qabyldaidy», delingen habarlamada.
Halyqaralyq kelisimder qos azamattyqty boldyrmaý jónindegi jumysty jeńildetedi, óitkeni ekinshi taraptyń azamattyǵyn alý týraly málimetterdi Qazaqstan qysqa merzimde alady.
«Sońǵy 2 jylda IIM-niń bastamasymen kóshi-qon salasynda 23 halyqaralyq kelisimge qol qoiyldy. Olardyń 5-ýi kóshi-qon salasyndaǵy yntymaqtastyqty retteidi (Ázerbaijanmen, Belarýspen, Qyrǵyzstanmen, Tájikstanmen, Ózbekstanmen), 15-i adamdardyń readmissiiasy máselelerin retteidi (Belarýs, Majarstan, Germaniia, Qyrǵyzstan, Latviia, Litva, Moldova, Norvegiia, Polsha, Resei, Tájikstan, Ózbekstan, Chehiia, Shveitsariia jáne Beniliýks elderi) jáne 3-i azamattardyń Taraptar aýmaǵynda bolý tártibin aiqyndaidy (Ázerbaijan, Qyrǵyzstan, Tájikstan)», delingen habarlamada.
Kelisimdermen zańsyz kóshi-qonǵa qarsy is-qimyl salasynda aqparat almasý tártibi retteldi, kóshi-qon zańnamasyn buzýshylardy basqa elderge berý týraly másele sheshildi. Sondai-aq sheteldikterdiń Qazaqstanda bolý merzimderi retteldi.
Vedomstvonyń málimetinge, qazir kóshi-qon salasyndaǵy taǵy 9 kelisim (Armeniia, Vetnam, Grýziia, QHR, Moldova, Resei, Túrkiia, Ýkraina, Frantsiia) kelisý men qaralý ústinde.
