Qazaqstanda koronavirýs pen pnevmoniiadan jazylǵan patsientterdi ońaltý boiynsha baǵdarlama iske qosylady. Bul týraly Densaýlyq saqtaý ministri Aleksei Tsoi málim etti, dep habarlaidy QazAqparat.
«Qazir bizde birqatar baǵdarlama ázirlenip jatyr. Tamyz aiynyń basynda tarifterdi bekitip, atalǵan qyzmetti iske qospaqpyz. Ol birneshe kezeńnen turatyn bolady», - dedi Aleksei Tsoi OKQ-da ótken baspasóz máslihatynda.
Onyń aitýynsha, baǵdarlamanyń alǵashqy kezeńi emhana deńgeiinde bastalady.
«Ekinshi kezeń statsionar deńgeiinde júrgiziledi. Ol jerde patsientter ońaltý boiynsha kómek ala alady», - dedi ministr.
Ministr baǵdarlama mindetti áleýmettik meditsinalyq saqtandyrý qory esebinen qarjylandyrylatynyn jetkizdi.
«Ol boiynsha tólem Mindetti áleýmettik meditsinalyq saqtandyrý qorynan júrgiziledi. Eń mańyzdysy, aýrýdyń aýyrlyq dárejesi boiynsha naqty talaptary, iaǵni patsientter ońaltýdyń qandai túrin alatyny aiqyndaldy. Aýrýdy ótkerý deńgeiine qarai naqty ońaltý baǵdarlamasy belgilenedi», - dedi Aleksei Tsoi.
