14 aqpan kúni Qazaqstan densaýlyq saqtaý ministrligi elde koronavirýstan taǵy jeti adamnyń qaitys bolǵanyn habarlady. Onyń tórteýi Covid infektsiiasyn juqtyrǵany PTR testimen rastalǵan naýqas bolsa, úsheýi – aýrý belgileri boiynsha koronavirýsqa uqsaityn pnevmoniia naýqasy.
Resmi derek boiynsha, PTR testimen rastalǵan Covid naýqastary arasynda barlyǵy 2642 adam qaitys bolǵan. Bul statistikaǵa koronavirýs juqtyrǵany dáleldengen, biraq "ózge aýrýdan qaitys boldy" degen júzdegen adam kirmei qalǵan.
Esebi 1 tamyzdan bastap júrgizile bastaǵan koronavirýs pnevmoniiasy aýrýynan barlyǵy 598 adam qaitys bolǵan. Bul – virýs juqtyrǵany PTR testimen rastalmaǵan naýqastar. Qazaqstan biligi 1 tamyzǵa deiin PTR testi teris nátije kórsetti dep koronavirýsqa uqsaityn pnevmoniia jaǵdailaryn koronavirýs statistikasyna qospady. Biraq maýsym, shilde ailarynda koronavirýsqa uqsaityn osyndai pnevmoniiaǵa shaldyqqandar kúrt kóbeiip ketken.
Elimizde koronavirýs juqtyrǵany PTR testimen rastalǵan naýqas sany 837 adamǵa artyp, 201 801-ge jetse, koronavirýs pnevmoniiasy naýqastarynyń sany 77 adamǵa artyp, 48 675-ke jetti.
