Qazaqstanda bir kúnde 41 Covid ólimi tirkeldi. Muny densaýlyq saqtaý ministrligi habarlady. Bul – mamyrdan basynan bergi eń joǵarǵy kórsetkish. 5 mamyr kúni ministrlik bir kúnde 43 adamnyń kóz jumǵanyn aitqan.
9 shilde kúni tirkelgen 41 ólimniń 38-inde koronavirýs PTR testimen anyqtalǵan (KVI+), úsheýinde diagnozy aýrý belgileri boiynsha (KVI-) qoiylǵan.
KVI+ boiynsha qaitys bolǵandardyń jalpy sany osylaisha 4647 adamǵa jetip otyr. Biraq buǵan koronavirýs juqtyryp qaitys bolǵan 2367 adamnyń ólimi qosylmaǵan. Densaýlyq saqtaý ministrliginiń sózinshe, bul adamdar basqa sebepten qaitys bolǵan, al koronavirýs jai ǵana ilespe diagnoz bolǵan.
8 shildede ótken baspasóz máslihatynda densaýlyq saqtaý birinshi vitse-ministri Marat Shoranov bas statistikasyna qosylmaǵan bul ólimderdiń 60 paiyzyna júrek-tamyr aýrýlary sebep bolǵan. Al ǵylymi derekterge qaraǵanda, koronavirýstyń saldarynan kóbine osy júrek-tamyr júiesine ziian tiedi. Onyń ústine Dúniejúzilik densaýlyq saqtaý uiymy da mundai jaǵdailardy koronavirýs ólimine qosý kerek dep sanaidy.
KVI- boiynsha 2020 jylǵy 1 tamyzdan beri 3489 adam qaitys bolǵan.
Qazaqstanda keiingi aptalarda koronavirýs indeti qaita órshidi. Densaýlyq saqtaý ministrligi muny «delta» shtamynyń taraýymen bailanystyrady. Elde alǵash ret maýsymnyń sońynda tirkelgen bul shtamm bastapqy túrlerine qaraǵanda edáýir juqpaly, onyń ólim qaýpi joǵary. Koronavirýs vaktsinalarynyń bul shtamnan qalai qorǵaityny týraly derek az, degenmen mamandar ekpe saldyrǵan adamnyń aǵzasy ekpe salmaǵan adamnyń azǵasyna qaraǵanda virýstyń bul túrin jeńil ótkeredi deidi.
Elde vaktsinalaý naýqany 1 aqpanda bastalǵan. Azamattarǵa bar-joǵy tórt vaktsina usynylǵan. Olar: reseilik "Spýtnik V", Qytaida ázirlenip, qazaqstandyq QazVac, BAÁ-de óndirilgen Hayat-Vax, qytailyq CoronaVac. Sońǵy kúnderi keiingi úsh vaktsinanyń birinshi dozasy taýsylyp jatyr degen aqparat tarady. Qazir ekpe ortalyǵyna alǵash barǵan adamǵa kóbine reseilik vaktsinany usynyp jatyr. 23 sáýirden bastap bul vaktsinany Qaraǵanda zaýytynda da óndiredi.
Osy kúnge deiin barlyǵy 2,4 million adam ekpeni tolyq alǵan. 190 myń adam ekinshi dozany kútip otyr.
19 millionǵa jýyq halqy bar Qazaqstanda koronavirýspen barlyǵy 512 685 adam tirkelgen.
