قازاقستاندا بٸر كٷندە 41 Covid ٶلٸمٸ تٸركەلدٸ. مۇنى دەنساۋلىق ساقتاۋ مينيسترلٸگٸ حابارلادى. بۇل – مامىردان باسىنان بەرگٸ ەڭ جوعارعى كٶرسەتكٸش. 5 مامىر كٷنٸ مينيسترلٸك بٸر كٷندە 43 ادامنىڭ كٶز جۇمعانىن ايتقان.
9 شٸلدە كٷنٸ تٸركەلگەن 41 ٶلٸمنٸڭ 38-ٸندە كوروناۆيرۋس پتر تەستٸمەن انىقتالعان (كۆي+), ٷشەۋٸندە دياگنوزى اۋرۋ بەلگٸلەرٸ بويىنشا (كۆي-) قويىلعان.
كۆي+ بويىنشا قايتىس بولعانداردىڭ جالپى سانى وسىلايشا 4647 ادامعا جەتٸپ وتىر. بٸراق بۇعان كوروناۆيرۋس جۇقتىرىپ قايتىس بولعان 2367 ادامنىڭ ٶلٸمٸ قوسىلماعان. دەنساۋلىق ساقتاۋ مينيسترلٸگٸنٸڭ سٶزٸنشە, بۇل ادامدار باسقا سەبەپتەن قايتىس بولعان, ال كوروناۆيرۋس جاي عانا ٸلەسپە دياگنوز بولعان.
8 شٸلدەدە ٶتكەن باسپاسٶز مەسليحاتىندا دەنساۋلىق ساقتاۋ بٸرٸنشٸ ۆيتسە-مينيسترٸ مارات شورانوۆ باس ستاتيستيكاسىنا قوسىلماعان بۇل ٶلٸمدەردٸڭ 60 پايىزىنا جٷرەك-تامىر اۋرۋلارى سەبەپ بولعان. ال عىلىمي دەرەكتەرگە قاراعاندا, كوروناۆيرۋستىڭ سالدارىنان كٶبٸنە وسى جٷرەك-تامىر جٷيەسٸنە زييان تيەدٸ. ونىڭ ٷستٸنە دٷنيەجٷزٸلٸك دەنساۋلىق ساقتاۋ ۇيىمى دا مۇنداي جاعدايلاردى كوروناۆيرۋس ٶلٸمٸنە قوسۋ كەرەك دەپ سانايدى.
كۆي- بويىنشا 2020 جىلعى 1 تامىزدان بەرٸ 3489 ادام قايتىس بولعان.
قازاقستاندا كەيٸنگٸ اپتالاردا كوروناۆيرۋس ٸندەتٸ قايتا ٶرشٸدٸ. دەنساۋلىق ساقتاۋ مينيسترلٸگٸ مۇنى «دەلتا» شتامىنىڭ تاراۋىمەن بايلانىستىرادى. ەلدە العاش رەت ماۋسىمنىڭ سوڭىندا تٸركەلگەن بۇل شتامم باستاپقى تٷرلەرٸنە قاراعاندا ەدەۋٸر جۇقپالى, ونىڭ ٶلٸم قاۋپٸ جوعارى. كوروناۆيرۋس ۆاكتسينالارىنىڭ بۇل شتامنان قالاي قورعايتىنى تۋرالى دەرەك از, دەگەنمەن ماماندار ەكپە سالدىرعان ادامنىڭ اعزاسى ەكپە سالماعان ادامنىڭ ازعاسىنا قاراعاندا ۆيرۋستىڭ بۇل تٷرٸن جەڭٸل ٶتكەرەدٸ دەيدٸ.
ەلدە ۆاكتسينالاۋ ناۋقانى 1 اقپاندا باستالعان. ازاماتتارعا بار-جوعى تٶرت ۆاكتسينا ۇسىنىلعان. ولار: رەسەيلٸك "سپۋتنيك V", قىتايدا ەزٸرلەنٸپ, قازاقستاندىق QazVac, باە-دە ٶندٸرٸلگەن Hayat-Vax, قىتايلىق CoronaVac. سوڭعى كٷندەرٸ كەيٸنگٸ ٷش ۆاكتسينانىڭ بٸرٸنشٸ دوزاسى تاۋسىلىپ جاتىر دەگەن اقپارات تارادى. قازٸر ەكپە ورتالىعىنا العاش بارعان ادامعا كٶبٸنە رەسەيلٸك ۆاكتسينانى ۇسىنىپ جاتىر. 23 سەۋٸردەن باستاپ بۇل ۆاكتسينانى قاراعاندا زاۋىتىندا دا ٶندٸرەدٸ.
وسى كٷنگە دەيٸن بارلىعى 2,4 ميلليون ادام ەكپەنٸ تولىق العان. 190 مىڭ ادام ەكٸنشٸ دوزانى كٷتٸپ وتىر.
19 ميلليونعا جۋىق حالقى بار قازاقستاندا كوروناۆيرۋسپەن بارلىعى 512 685 ادام تٸركەلگەن.
