Qazaqstanda koronavirýs infektsiiasynan bir áiel qaitys boldy. Bul týraly QR Aqparat jáne qoǵamdyq damý ministri Dáýren Abaev málim etti dep habarlaidy "Ult aqparat".
«Ókinishke qarai búgin koronavirýsten naýqas bir áiel qaitys boldy. Bul - orny tolmas aýyr qaza. Marqumnyń jaqyndaryna kóńil aitamyz», - dedi Dáýren Abaev «Habar 24» arnasynda onlain rejimde ótken baspasóz máslihatynda.
"Osy oqiǵa koronavirýstyń qanshalyqty qaýipti ekenin kórsetip otyr. Biz úshin bul - úlken synaq. Biliktiń oqshaýlaýǵa qatysty talaptaryn oryndap, tótenshe jaǵdai men karantindi saqtaý qajet. Úide bolyńyzdar, aman bolaiyq", - dep tolyqtyrdy Abaev.
Osy oraida ministr 28 naýryzdan bastap Nur-Sultan, Almaty men Shymkent qalalarynda jańa shekteýlerdiń engiziletinin eske saldy.
"Bul komendanttyq saǵat emes. Alaida tótenshe jaǵdaidyń barlyq talabyn saqtaýdy suraimyz", - dep túiindedi ol.
Qazaqstanda koronavirýs juqtyrǵandar sany 109 adamǵa jetti. Nur-Sultan qalasynda - 61 adam, Almaty qalasynda – 40 adam, Qaraǵandy qalasynda - 2, Shymkent qalasynda - 2, Almaty oblysynda - 1, Aqtóbe oblysynda - 1, Jambyl oblysynda -1, Soltústik Qazaqstan oblysynda - 1 adam tirkeldi.
16 naýryzdan bastap Qazaqstanda koronavirýsqa bailanysty tótenshe jaǵdai rejimi jariialandy. Al 19 naýryzdan astana men Almaty karantinge jabylǵan bolatyn.
