Qyzylorda oblysynda 30 jastaǵy naýqas koronavirýstan emdelip shyqty. Bul týraly QR Densaýlyq saqtaý ministri Eljan Birtanov Facebook paraqshasynda jazdy, dep habarlaidy "Ult aqparat".
«Dostar, jaqsy jańalyqpen bóliskim keledi! Búgin statsionardan COVID -19 dertine shaldyqqan 1000-shy naýqas emdelip shyqty. Ol - Qyzylorda oblysynda emdelip jatqan 30 jastaǵy adam. Qyzylorda oblystyq juqpaly aýrýlar aýrýhanasyna 16 sáýirde koronavirýs infektsiiasyn juqtyrǵan adammen bailanysta bolǵandyqtan túsken. Onyń jaǵdaiy ortasha aýyr bolǵan. Dene qyzýy 38 gradýsqa deiin kóterilip, qurǵaq jótel jáne álsizdik bilindi. Onyń ókpesin rentgenge túsirgen kezde sol jaq ókpesiniń interstitsialdy qabynýy bolǵany anyqtaldy», - deidi Eljan Birtanov.
Oǵan «COVID-19 koronavirýs infektsiiasy, sol jaq ókpeniń qabynýy, ortasha aýyr deńgei» diagnozy qoiylǵan.
«Emdeý COVID-19-dy emdeý jáne diagnostikalaý protokolyna sáikes júrgizildi. Emdelgennen keiin araǵa 24 saǵat salyp eki ret koronavirýsqa zerthana tekserý jumysy júrgizildi. Test nátijesinde koronavirýstan emdelgeni anyqtaldy. Statsionardan shyǵar kezde eshqandai shaǵymy bolǵan joq. Dárigerler ony 21 kún úide karantinde otyrý usynymymen shyǵardy. Men aldyńǵy shepte júrgen dárigerlerge alǵys aitqym keledi. Jaraisyzdar! Rahmet», - deidi ministr.
