24 naýryz saǵat 22:20-daǵy jaǵdai boiynsha koronavirýs indetin juqtyrǵan taǵy 1 adam Nur-Sultan qalasynda tirkeldi, dep habarlaidy "Ult aqparat" coronavirus2020.kz-ke silteme jasap.
«Osy saǵatta Nur-Sultan qalasy boiynsha 36 adam, Almaty qalasynda – 29 adam, Qaraǵandy qalasynda - 2, Almaty oblysynda - 1 adam, Aqtóbe oblysynda - 1 adam, Shymkent qalasynda – 1 adam, jalpy 70 naýqas tirkeldi», delingen habarlamada.
Úkimettiń dereginshe, virýs juqtyrǵandardyń 80 paiyzynda simptom joq ia sál ǵana qyzýy kóterilgen. Nur-Sultanda bir naýqas jasandy apparatqa qosylǵan.
Budan bólek, Germaniiada bir jáne Vengriiada bir qazaqstandyqtan virýs tabylǵan. Aqparat jáne qoǵamdyq damý ministri Dáýren Abaevtyń aitýynsha, Germaniiadaǵy qazaqstandyqtyń jaǵdaiy jaqsaryp, aýrýhanadan shyqqan.
Qazaqstanda koronavirýsqa bailanysty 15 sáýirge deiin tótenshe jaǵdai. 19 naýryzdan bastap Almaty men Nur-Sultan qalalary karantinge kóshti. Bul eki qaladaǵy barlyq saýda oryny men oiyn-saýyq ortalyǵy jabyq. Tek azyq-túlik satatyn oryndar men dárihanalar ashyq. Al karantin jariialanbaǵan basqa aimaqtarda bazarlar, saýda oryndary ashyq.
Qazaqstan densaýlyq saqtaý ministri Eljan Birtanov elde Covid-19 indetine shaldyqqandar 15 sáýirden keiin azaia bastaidy dep sanaidy.
