QR Densaýlyq saqtaý ministri Eljan Birtanov koronavirýsqa qarsy vaktsina ázirleý týraly tilshiler suraǵyna jaýap berdi, dep habarlaidy QazAqparat.
«Qazaqstan Úkimeti úshin negizgi maqsat – infektsiianyń kirmeýi jáne taralmaýy bolyp otyr. Sondyqtan negizgi qarajat halyq pen meditsinalyq qyzmetkerlerdi, shekarashylardy qorǵaýǵa baǵyttalǵan. Odan bólek, koronavirýs kúdigi bar paitsentterdiń barlyǵyn jetkilikti túrde tekserip, dárilik zattar qoryn jasaý úshin diagnostikalyq tehnologiialarǵa mán berilgen», - dedi E. Birtanov elordada ótken baspasóz máslihatynda.
Onyń aitýynsha, Bilim jáne ǵylym ministrligi men oǵan baǵynyshty ǵylymi ortalyqtar osyndai vaktsinany ázirleýge daiyn ekendikterin habarlaǵan.
«Bizdiń elimizde vaktsina jasaý boiynsha jaqsy tájiribe bar. Bul jaǵdaida sáikes ǵylymi ortalyqtarda belgili bir jumystar bar. Alaida munyń qiyn tehnologiialyq protsess ekenin túsiný qajet jáne barlyq halyqaralyq ǵylymi ortalyqtarmen úilestirý júmystaryn júrgizý kerek. Qazir vaktsina jasaý boiynsha ózge elderdiń ǵalymdarymen birlesip jumys isteý múmkindigin qarastyryp jatyrmyz», - dedi ol.
Árine, mundai vaktsina shyǵarylsa, ol óte sapaly jáne qaýipsiz bolýy kerek.
«Ekinshiden, halyqqa qoljetimdi bolýy kerek. Qazir bir nárseni naqty aitýǵa erte. Bálkim, Qazaqstan men ózge de memleketter jasaǵan sanitarlyq sharalar infektsiianyń azaiýyna yqpal etken shyǵar. Bul indetti jaqyn arada eńseremiz dep úmittenemin jáne vaktsinany ázirleý jumystaryn qatar júrgize beremiz», - dedi Eljan Birtanov.
