26 naýryz keshki saǵat 23.55-degi derek boiynsha, Jambyl oblysynda taǵy eki adamnyń koronavirýs juqtyrǵany belgili boldy. Bul týraly densaýlyq saqtaý ministrligi habarlady.
Elde qazir 113 adamǵa virýs juqqany anyqtaldy: Almatyda - 40 adam, Nur-Sultanda - 61 adam, Qaraǵandyda - tórt adam, Jambyl oblysynda - úsh adam, Shymkentte - eki adam, Almaty oblysynda - bir adam, Aqtóbe oblysynda - bir adam, Soltústik Qazaqstan oblysynda bir adam.
26 naýryz keshkisin Nur-Sultanda bir áiel adam Covid-19 dertinen qaitys boldy. 25 naýryzda Almatyda bir, Nur-Sultanda bir naýqas dertinen aiyqqan edi.
Qazaqstanda koronavirýsqa bailanysty 15 sáýirge deiin tótenshe jaǵdai. 19 naýryzdan bastap Almaty men Nur-Sultan qalalary karantinge kóshti.
Al 28 naýryzdan bastap eldegi iri úsh qalada - Almaty, Nur-Sultan, Shymkentte shekteýler kúsheiedi:
- Endi úsh qaladaǵy jurt jumysqa, azyq-túlik jáne dári alýǵa ǵana shyǵa alady.
- Park, jaiaý júrginshiler kóshesi, jaǵalaýlar, oiyn alańdary jabylady.
- Qoǵamdyq kólikterdiń jumysy shektele bastaidy.
- Qoǵamdyq oryndarda úsh adamnan artyq jinalýǵa bolmaidy. Bul shekteýdiń bir otbasynyń adamdaryna qatysy joq.
- Balalar eresektersiz kóshege shyǵýǵa tyiym salynady.
Ótken jyldyń sońynda Qytaida alǵash ret tirkelgeli beri álemde koronavirýs juqtyrǵanar jarty millionǵa jýyqtap qaldy. AQSh-taǵy Djon Hopkins ýniversitetiniń dereginshe, 26 naýryzda álemde virýs juqtyrǵandar 490 myńnan asty. 22 myńnan asa adam qaza bolyp, 119 myńnan astam naýqas dertten aiyqty. Dúniejúzilik densaýlyq saqtaý uiymy Covid-19 koronavirýsyn "pandemiia" dep jariialaǵan.
