Qazaqstanda koronavirýs juqtyrǵandar kúrt kóbeidi. 29 maýsymda 2016 adamnyń koronavirýs testi oń shyqty. Jartysyna jýyǵy Nur-Sultan men Almatydan anyqtalǵan.
Bir kún buryn 1300-den astam adamnyń koronavirýs testi oń shyqqan edi. Resmi málimet boiynsha, elde sońǵy ret 2000-nan astam naýqas 22 mamyrda tirkelgen.
Qazaqstanda "úndistandyq shtamnyń" taralyp jatqany jaily aqparat shyqqaly beri koronavirýs juqtyrǵandar kóbeiip jatyr. Densaýlyq saqtaý ministrligi ótken aptadan beri naýqastar 39 paiyzǵa ulǵaiǵanyn habarlaǵan.
Sársenbi kúni Almaty qalasynyń ákimdigi qalada "úndistandyq shtamnyń úles salmaǵy" 78 paiyzǵa jetti dep habarlady.
Seisenbi kúni Nur-Sultanda 678 adamnan koronavirýs anyqtaldy. Bul - respýblika boiynsha eń joǵary kórsetkish. Qaraǵandyda – 302, Almatyda – 253, Batys Qazaqstan oblysynda – 126, Shymkentte 103 naýqas tirkelgen. Qalǵan oblystarda anyqtalǵan naýqastar júzge jetpeidi.
28 maýsymda 83 adamnan pnevmoniianyń koronavirýsqa uqsas túri (koronavirýs pnevmoniiasy) anyqtalǵan. Bir kúnde 13 adam koronavirýstan qaitys bolǵan.
2020 jyldyń naýryz aiynan beri elde 423 137 adamnyń koronavirýs testi oń shyqqan. Sodan beri 4 349 adam qaitys bolǵan. 1 tamyzdan beri 57 025 adam koronavirýs pnevmoniiasyna shaldyqqan, 3 446-sy qaitys bolǵan.
30 maýsymdaǵy málimet boiynsha, elimizde 24 822 adam koronavirýs infektsiiasynan (23 526 KVI+ jáne 1 296 KVI-) emdelip jatyr. Olardyń ishinde 7 453 patsient statsionarda, 17 369 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
- 493 adamnyń jaǵdaiy aýyr,
- 103 patsienttiń jaǵdaiy óte aýyr,
- 67 naýqas ÓJJ apparatynda jatyr.
Qazaqstanda koronavirýsqa qarsy vaktsinanyń keminde birinshi dozasyn alǵandar 3 mln 335 myń adamǵa jetti. 2 mln adamǵa vaktsinanyń eki dozasy salynǵan. Elde jalpy vaktsinanyń 5,2 mln dozasy paidalanylǵan.
Djons Hopkins ýniversitetiniń málimetinshe, indet bastalǵaly beri álemde 181 mln 761 myń adam koronavirýs aýrýyna shaldyqqan. 3 mln 937 myń adam qaitys bolǵan. Koronavirýs juqtyrǵandar sany jóninen Qazaqstan álemde 45-orynda tur.
