7 shildede Qazaqstanda 2800 adamnyń koronavirýs testi oń shyqty. 2020 jyldyń naýryz aiynan beri 445 091 adamǵa koronavirýs juqqany arnaiy testpen dáleldengen.
6 shildede 26 adam pnevmoniianyń koronavirýsqa uqsas túrine shaldyqqan. PTR nátijesi teris, biraq simptomdary koronavirýsqa uqsas "pnevmoniia" statistikasy byltyr tamyzdan beri júrgizilip keledi. Ministrlik málimetinshe, sodan beri elde 57 490 adam "pnevmoniianyń" sol túrine shaldyqqan.
Osylaisha Qazaqstanda koronavirýs testi oń shyqqandar men pnevmoniianyń koronavirýsqa uqsas túrine shaldyqqandar jarty millionnan asyp, 502 581 adam boldy. Halyqaralyq sarapshylar pnevmoniianyń koronavirýsqa uqsas túrin Covid dep sanaidy. Biraq Qazaqstan densaýlyq saqtaý ministrligi koronavirýs pnevmoniiasyn Covid statistikasyna qospai keledi.
Seisenbi kúni koronavirýs testi oń shyqqandar arasynda 28 adam ólimi tirkelgen, 6 adam koronavirýs pnevmoniiasynan qaitys bolǵan. Indet bastalǵaly beri resmi málimet boiynsha, 4544 adam – koronavirýstan, 3476 adam koronavirýs pnevmoniiasynan qaitys bolǵan.
Koronavirýsqa qatysty adam ólimi statistikasyna virýsqa shaldyqqan myńnan asa adam marqum enbei qaldy. Ministrlik qurǵan komissiia olardyń qazasyna basqa dert sebep boldy dep tapqan.
Ministrliktiń málimetinshe, qazir 35 myńnan astam adam koronavirýstan emdelip jatyr, basym bóliginiń koronavirýs testi oń shyqqan. 11 myńǵa jýyq patsient statsionarda jatyr: shamamen 900 adamnyń jaǵdaiy aýyr nemese óte aýyr. 91 adam jasandy tynys apparatyna qosylǵan.
Qazir eldegi iri úsh qala men alty oblys "qyzyl aimaqta": Nur-Sultan, Almaty, Shymkent qalalary, Aqmola, Atyraý, BQO, Qaraǵandy, Mańǵystaý jáne Pavlodar oblystary. Aqtóbe, Qostanai, SQO, Qyzylorda, Almaty, Jambyl oblystary virýs taraýy jaǵynan ortasha "sary aimaqta" tur. Qalǵan Túrkistan men Shyǵys Qazaqstan oblystary – "jasyl aimaqta".
Ministrliktiń dereginshe, 8 shildege deiin 4 millionnan astam adam koronavirýsqa qarsy ekpeniń bir dozasyn; 2,28 mln adam eki dozasyn alǵan. Elde reseilik "Spýtnik V", qazaqstandyq QazVac, HayatVax (BAÁ elinde daiyndalǵan Qytaidyń ekpesi), qytailyq Coronavac ekpesin salyp jatyr.
AQSh-taǵy Djons Hopkins ýniversitetiniń esebinshe, indet bastalǵaly beri álemde 185 mln adam Covid dertine shaldyqqan. 4 millionǵa jýyq adam qaitys bolǵan.
