Qazaqstanda koronavirýs meditsina qyzmetkerleriniń kásiptik syrqatyna teńestirilýi múmkin. Osy turǵyda dárigerlerge shyǵyn óteledi. Bul týraly QR Eńbek jáne halyqty áleýmettik qorǵaý ministrligi Eńbek, áleýmettik qorǵaý jáne kóshi-qon komiteti tóraǵasynyń orynbasary, bas memlekettik eńbek inspektory Tólegen Ospanqulov málim etti, dep habarlaidy QazAqparat.
«Meniń oiymsha, barlyq ólshemderge tolyq sai kelse, meditsinalyq qyzmetkerlerge qatysty atalǵan aýrý kásiptik syrqat dep sanalýy kerek. Al kásiptik syrqat bolǵandyqtan, ár jazataiym oqiǵany tiisti mekeme tekserý tiis. Sáikesinshe, árbir jaǵdai boiynsha qyzmetkerlerge birjolǵy tólem emes, shyǵyndy óteý eskeriledi. Bul óz kezeginde elimizdiń zańnamasynda qamtylǵan», - dedi bas memlekettik eńbek inspektory koronavirýsqa qarsy sharalarǵa jumyldyrylǵan densaýlyq saqtaý qyzmetkerlerin áleýmettik-ekonomikalyq turǵydan qoldaý taqyrybyna arnalǵan onlain talqylaýda.
Osy oraida ol eki apta buryn Eńbek ministrliginde qoǵamdyq tyńdaý bolǵanyn, onda hattamalyq túrde Densaýlyq saqtaý ministrliginde tiisti jumys tobyn qurý tapsyrmasy berilgenin aitty. Bul jumys toby COVID-19-dy kásiptik syrtqat sanatyna engizý máselesin qarastyratyn bolady.
«Menińshe, osy turǵyda Densaýlyq saqtaý ministrligimen aradaǵy bizdiń jumys ońtaily nátije berip, tiis sheshim qabyldanady», - dedi Tólegen Ospanqulov.
