Qazaqstanda alty aiǵa kólikpen kómir áketýge tyiym salýdy engizý josparlanyp otyr. Qujat jobasy "Ashyq NQA" portalynda jariialandy, - dep habarlaidy Tengrinews.kz.
"Kómirdi áketýdi retteýdiń keibir máseleleri týraly" buiryq jobasyn Indýstriia jáne infraqurylymdyq damý ministrliginiń Indýstriialyq damý komiteti qoǵamdyq talqylaýǵa shyǵardy.
Briketter, túiirshikter jáne tas kómirden alynǵan qatty otynnyń uqsas túrlerin: tas kómirdi, untaqtalǵan nemese untaqtalmaǵan, biraq aglomeratsiialanbaǵan tas kómirdi avtomobil kóligimen alty ai merzimge eksporttaýǵa tyiym salý josparlanǵan (Eýraziialyq ekonomikalyq odaqtyń syrtqy ekonomikalyq qyzmeti taýarynyń nomenklatýra kody 2701).
Jylytý kezeńiniń basynda QR Indýstriia jáne infraqurylymdyq damý ministrligi jergilikti atqarýshy organdardyń derekteri negizinde 2021-2022 jylǵa arnalǵan kommýnaldyq-turmystyq jáne turǵyndar úshin kómir ónimderiniń qajettilik josparyn qalyptastyrdy.
"Osy josparǵa sáikes, kómirdi tutyný kólemi shamamen 9,6 million tonna, onyń ishinde kommýnaldyq-turmystyq sektorǵa - 2,6 million tonna, halyqqa - 7 million tonna.
Sonymen qatar, qyrkúiekte aýa raiynyń salqyndaýyna bailanysty eldiń ortalyq jáne soltústik aimaqtarynda kómirge suranys kúrt ósedi.
Osy jaǵdaidy paidalana otyryp, josyqsyz alypsatarlar kómirdi satyp alýdyń eń joǵary kezeńinde kómir baǵasyna "ainalymdaryn" qosty, iaǵni 13 myń teńgeden satyp alyp, tonnasyna 30 myń teńgege deiin qaita satty, bul halyq úshin keri áserin tigizdi. BAQ arqyly turǵyndardan ishki naryqqa arnalǵan kómir eksportqa shyǵarylady degen ótinishter kelip tústi", - delingen túsindirme jazbada.
Taldaý kórsetkishi kórshi elderge kómir eksporty, atap aitqanda: Qyrǵyz Respýblikasyna 19 paiyzǵa, Ózbekstan Respýblikasyna 30 paiyzǵa artqanyn kórsetti.
"Halyqty kómirmen jáne energetikalyq qaýipsizdikpen qamtamasyz etý boiynsha dúrlikpeni boldyrmaý maqsatynda QR Indýstriia jáne infraqurylymdyq damý ministrligi eń joǵary kezeńde, iaǵni 2022 jylǵy 1 shildeden bastap 6 aiǵa kómirdi kólikpen áketýge tyiym salý oryndy dep sanaidy.
2022 jylǵy 8 shildedegi syrtqy saýda saiasaty jáne Halyqaralyq ekonomikalyq uiymdarǵa qatysý máseleleri jónindegi Vedomstvoaralyq komissiianyń (VAK) otyrysynda Qazaqstan Respýblikasynyń aýmaǵynan avtomobil kóligimen kómir áketýge ýaqytsha tyiym salýdy belgileýdiń oryndylyǵy qoldaý tapty", - delingen qujatta.
