Ulttyq banktiń qolma-qol aqsha ainalysy departamentiniń direktory Jomart Qajymuratov ulttyq valiýtanyń banknottary men monetalaryn satý jáne satyp alý qaǵidalaryna qandai ózgerister engizilgenin aityp berdi, dep habarlaidy QazAqparat.
Qazaqstan Ulttyq banki ulttyq valiýta monetalaryn úsh túrde shyǵarady: tsirkýliatsiialyq, investitsiialyq jáne kollektsiialyq.
Jomart Qajymuratovtyń aitýynsha, banknottar men monetalardy satý jáne satyp alý qaǵidalaryndaǵy ózgerister tek qymbat metaldan jasalǵan kollektsiialyq monetalarǵa qatysty.
Aita ketsek, kollektsiialyq monetalar baǵaly metaldar (altyn jáne kúmis) men baǵaly emes metaldardan (melhior jáne neizilber) shekteýli taralymmen daiyndalady. Olar kollektsiia jasaýǵa jáne nýmizmatikalyq (ekinshi) naryqty damytýǵa baǵyttalady, sebebi kollektsiialyq monetalarǵa degen suranys – onyń taralymyna, taqyrybyna, dizainyna, daiyndaý sapasy men qoldanylatyn tehnologiialary sekildi faktorlarǵa bailanysty artady.
«Emitentter (memleketterdiń ortalyq nemese ulttyq bankteri) úshin kollektsiialyq monetalardy shyǵarý kommertsiialyq joba bolyp sanalmaidy. Ulttyq bank kollektsiialyq monetalardy ainalymǵa shyǵara otyryp, eldiń mádeni, tarihi murasyn saqtaidy jáne nasihattaidy, jetistikke toly eleýli oqiǵalardy este saqtap qalýǵa úles qosady, demek, tanymdy damytý missiiasyn oryndaidy degen sóz», - deidi Jomart Qajymuratov
Naryqty odan ári damytý úshin Ulttyq bank baǵaly metaldardan jasalǵan kollektsiialyq monetalardy satý jáne satyp alý baǵalaryn belgileýge qatysty ózgerister engizgen.
«Azamattar kollektsiialyq monetalardy, ádettegidei, Ulttyq Bankke aqshasyna keri tapsyra alady. Biraq olar bastapqy ýaqytta satylǵan baǵamen qabyldanady, oǵan monetany daiyndaý quny men metaldy satyp alý kúni aiqyndalatyn metall quny kiredi. Álemniń kóptegen elinde, mysaly, Germaniiada, Shveitsariiada jáne Irlandiiada kollektsiialyq monetalar nominaldy (belgilengen) qunymen keri satyp alýǵa qabyldanady. Al AQSh-ta, kanadada jáne Avstraliiada kollektsiialyq monetalar keri satyp alýǵa qabyldanbaidy», – deidi Ulttyq bank ókili.
