Elimizde kollektorlardy qylmystyq jaýapqa tartý múmkindigi qarastyrylyp jatyr. Bul týraly QR Qarjy naryǵyn retteý jáne damytý agenttigi tóraǵasynyń orynbasary Oleg Smoiakov Úkimet otyrysynda málim etti, dep habarlaidy QazAqparat.
«Qarjylyq qyzmet tutynýshylarynyń quqyǵyn qorǵaýdy kúsheitý úshin biyl bizdiń agenttik zańnamalyq túzetýler engizý bastamasyn kóterdi. Nátijesinde retteýshilik sipattaǵy sharalar qabyldandy. Atap aitar bolsaq, biyl mamyrda banktik, mikroqarjy jáne kollektorlyq qyzmetti retteý máseleleri boiynsha zań qabyldandy. Jańa zańda bankter men mikroqarjy uiymdar aldyndaǵy azamattardyń merzimi ótken bereshegin qaitarý tártibi qaita qaralǵan. Sondai-aq bankterdiń barlyq ipotekalyq qaryzdar boiynsha syiaqylary, turaqsyzdyq aiyby, komissiialar men ózge de tólemder tóleýdi talap etýine tyiym salý engizilgen», - dedi Oleg Smoliakov.
Sonymen qatar agenttik basshysynyń orynbasary kollektorlar úshin qosymsha shekteýler engizilgenin aityp ótti.
«Prezidenttiń tapsyrmasy boiynsha kollektorlyq uiymdardyń zańsyz áreketterinen azamattardyń quqyqtaryn qorǵaý maqsatynda bizdiń agenttik kollektorlyq agenttik qyzmetkerlerine qatysty ákimshilik jáne qylmystyq jaýapkershilikti qarastyrýdy usynyp otyr. Búginde Bas prokýratýra usynys jasalyp, kollektorlar qyzmetin retteýdi qatańdatý boiynsha qosymsha sharalar pysyqtalyp jatyr», - deidi ol.
