QR ekologiia, geologiia jáne tabiǵi resýrstar ministri Maǵzum Myrzaǵaliev «Qazaqstan men AQSh saýda-ekonomikalyq qatynastaryna 30 jyl» atty Qazaqstan-Amerika investitsiialyq forýmynyń otyrysyna qatysty, dep habarlaidy "Ult aqparat" atalǵan vedomstvonyń baspasóz qyzmetine silteme jasap.
Maǵzum Myrzaǵaliev «Energetika jáne taý-ken ónerkásibi (jasyl tehnologiialar jáne sirek kezdesetin metaldar)» Paneldik sessiiasynyń jumysyna qatysty. Ministr óz sózinde «jasyl» tehnologiialar naryǵyn damytý úshin Qazaqstan Ekologiialyq kodeks, jańartylatyn energiia kózderin paidalanýdy qoldaý týraly Zań jáne «jasyl» ekonomikaǵa kóshý tujyrymdamasy siiaqty birqatar normativtik qujattardy qabyldaǵanyn aitty.
Sonymen qatar AQSh Prezidentiniń klimat jónindegi arnaiy ókili Djon Kerrimen onlain kezdesý barysynda qazaqstan tarapy Qazaqstanda klimat máseleleri boiynsha Ortalyq Aziianyń óńirlik habyn qurý týraly bastama kóterdi. Maǵzum Myrzaǵaliev Qazaqstanda jańa ken oryndaryn (litii oksidi, quramynda osmii totyǵy bar mys qumtas, sondai-aq quramynda tantal bar kender, onyń ishinde ilespe niobii bar) ashý perspektivalary bar ekenin atap ótip, osy jobalardy iske asyrý úshin AQSh-pen yntymaqtastyqty keńeitý múmkindigin quptady.
Sondai-aq Maǵzum Myrzaǵaliev Tesla, Lucid Motors, Nikola siiaqty amerikalyq elektromobildik kompaniialardyń jetekshi rólin, GM, Ford siiaqty iri avtoóndirýshilerdiń elektr qozǵaltqyshtaryna kóshý jónindegi uzaq merzimdi strategiialaryn eskere otyryp, qazaqstan tarapy litii-iondy akkýmýliatorlar óndirýge arnalǵan zaýyttar salý boiynsha amerikalyq tarappen yntymaqtasýǵa daiyn ekenin atap ótti.
