Qazaqstandyqtardyń kiris ósiminiń qarqyny baiaýlady. Bul jaiynda Májilis depýtattarynyń saýalyna QR Premer-Ministri Álihan Smaiylovtyń jaýabynda aitylǵan, dep habarlaidy QazAqparat.
«2025 jylǵa deiin halyqtyń tabysyn arttyrý baǵdarlamasy halyqtyń kirisine tikelei áser etetin barlyq sebep pen faktorlardy saraptaýdy eskere otyryp ázirlendi. Aitalyq, eńbek naryǵyna, sonymen qatar kedeishilik pen jumyssyzdyq deńgeii boiynsha naqty ahýalǵa, halyqtyń kirisi men shyǵysynyń qurylymyna saraptama júrgizildi. Saraptama nátijesinde oń dinamikaǵa qaramastan, halyqtyń shynaiy kirisiniń ósim qarqyny 2019 jylǵy 6,4 paiyzdan 2021 jyly 5,1 paiyzǵa deiin baiaýlady», - delingen Úkimet basshysynyń jaýabynda.
Premer-Ministrdiń paiymynsha, bul jait 2020 jyly ekonomika ósimi qarqynynyń 2,5 paiyzǵa tómendeýimen jáne infliatsiialyq qysymnyń (2020 jyly – 7,5, 2021 jyly – 8,4 paiyz) joǵary bolýymen bailanysty.
«Ortasha jáne mediandyq jalaqy arasyndaǵy teńsizdiktiń ósýi jáne aiyrmashylyqtyń 1,5 esege artýy (EYDU elderindegi aiyrmashylyq 1,13 ese) baiqalady. Halyq kirisin árkelki bólý tendentsiiasy anyqtaldy. Aitalyq, kirisi eń tómen halyq tobynda úi sharýashylyǵyndaǵy shynai tabystyń tómendeýi baiqalady jáne tabysy óte joǵary topqa esh áser etpegen. Halyqtyń kirisi qurylymynda eńbek qyzmetinen alynatyn tabystyń azaiýy jáne áleýmettik transfertterden tabystyń ósýi baiqalady. Halyqtyń jumys istep tabatyn tabysynyń úlesi sońǵy 10 jylda 10,6 paiyzdyq tarmaqqa (2010 jylyǵy 71,3 paiyzdan 2021 jyly 60,7 paiyzǵa deiin) tómendegen. Óz kezeginde, áleýmettik transfertter úlesi 10 paiyzdyq tarmaqqa (2010 jylǵy 15,3 paiyzdan 2021 jyldyń 3-toqsanynda 25,3 paiyzǵa deiin) ósti», - dedi Álihan Smaiylov.
