Búgin QR Premer-Ministriniń orynbasary Eraly Toǵjanovtyń tóraǵalyǵymen Koronavirýstyń taralýyna jol bermeý jónindegi vedomstvoaralyq komissiia halyq pen memlekettik organdardyń usynystaryn eskere otyryp, elimizde shekteý sharalaryn tómendetý boiynsha qosymsha sheshimder qabyldady.
2020 jylǵy 1 maýsymnan bastap:
1) Óńiraralyq blok-beketter alynady. Bas memlekettik sanitarlyq dárigerler men óńirler ákimdikteriniń sheshimi boiynsha koronavirýstyń taralý oshaǵy bar aimaqtarda jergilikti blok-beketter saqtalýy múmkin.
2) Qazaqstannyń oblys ortalyqtary men iri qalalaryna temir jol tasymaldary, sondai-aq óńiraralyq avtobýspen jolaýshylar tasymaly qaita jańǵyrtylady.
Jolaýshylardy tasymaldaý qatań túrde Densaýlyq saqtaý ministrliginiń bekitilgen sanitarlyq talaptaryna sáikes júzege asyrylady.
Temirjol jáne avtovokzaldarda bekitilgen talaptardyń oryndalýy Ishki ister ministrliginiń qyzmetkerleriniń baqylaýynda bolady.
3) Fitnes jáne SPA ortalyqtarynyń qyzmeti qaita jandanady;
4) Sport jáne mádeniet obektileri kórermensiz jumys istei bastaidy.
5) Mektepke deiingi balalar mekemeleriniń, qosymsha bilim berý uiymdarynyń (bir topta 15 baladan kóp emes), ǵylymi-zertteý institýttarynyń jáne ǵylymi ortalyqtardyń jumysy jandanady.
2020 jyldyń 15 maýsymynan bastap sanitarlyq talaptardy saqtaǵan jaǵdaida kinoteatrlardyń jumysy qaita qalpyna keltiriletin bolady.
Sonymen qatar birqatar elderde sanitarlyq-epidemiologiialyq jaǵdaidyń turaqtalýyn eskerýmen, Vedomstvoaralyq komissiia memlekettik organdarǵa halyqaralyq áýe reisterin kezeń-kezeńmen jańǵyrtý máselesin pysyqtaýdy tapsyrdy (I kezeń aiasynda Ońtústik Koreia, Qytai Halyq Respýblikasy jáne Ázerbaijanmen; II kezeń aiasynda Birikken Arab Ámirligi, Germaniia, Túrkiia jáne Tailandpen).
Halyqaralyq áýe reisteriniń qaita ushyryla bastaityn kúni memlekettik shekaralardyń ashylýyna jáne sanitarlyq-epidemiologiialyq jaǵdaiǵa bailanysty anyqtalatyn bolady.
Birqatar salalar men obektilerdiń jumysqa kirisýin eskere otyryp, Vedomstvoaralyq komissiia qazaqstandyqtarǵa aýrýdyń aldyn-alý sharalaryn qatań saqtaý qajettigin eske salady (maska kiiý, áleýmettik araqashyqtyqty saqtaý, qarym-qatynasty azaitý).
Otyrys qorytyndysy boiynsha Premer-Ministrdiń orynbasary E. Toǵjanov birqatar naqty tapsyrmalar berdi.
