2020 jylǵy 1 qańtardan bastap jumyspen qamtýǵa járdemdesý tetikterin jetildirý úshin Memleket basshysynyń tapsyrmasy boiynsha Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasyna ázirlengen jańashyldyqtar kúshine endi, dep habarlaidy "Ult aqparat".
Eńbek jáne halyqty áleýmettik qorǵaý ministrliginiń málimetinshe, biýdjet shyǵyndarynyń tiimdiligin arttyrý úshin qysqa merzimdi kásiptik oqytý tetigi qaita qaraldy. Endi ol oqytylǵan adamdardy jumysqa ornalastyrýǵa kepildik beretin jumys berýshilerdiń ótinimderi boiynsha júzege asyrylady.
Jumys berýshiniń qaita daiarlaý kýrstary qunynyń keminde 50 paiyzyn qosa qarjylandyrý shartymen eńbeksharty boiynsha jumys isteitinderdi kásiptik daiarlaý jónindegi tetik engizildi. Bul shara eńbeksharty boiynsha jumys isteitinderge eńbek jolynyń barlyq kezeńderinde bilim alýǵa múmkindik beredi. Sondai-aq jumys berýshilerdiń óz qyzmetkerleriniń jańa bilim men daǵdylardy alýyna múddeliligin arttyrady.
Kópbalaly jáne tabysy az otbasy múshelerin kásipkerlikke tartý úshin olarǵa mikrokreditter jyldyq 4 paiyzdan aspaityn paiyzdyq stavkamen 7 jylǵa deiingi merzimge jeńildikti sharttarmen beriledi.
Sonymen qatar, halyqtyń barlyq sanattary úshin biryńǵai memlekettik granttardyń mólsheri belgilendi – 200 AEK. Sonymen birge kópbalaly jáne tabysy az otbasylardyń músheleri aldyn ala oqytýsyz grant alýǵa quqyly.
Jastardy memlekettik qoldaý sharalary qaita qaraldy. Jastar tájiribesine 2020 jyldan bastap qosymsha eki jańa qural - «Birinshi jumys orny» jáne «Urpaqtar kelisimsharty» jobalary engizildi.
«Birinshi jumys orny» jobasy 29 jastan aspaǵan, onyń ishinde NEET sanatyndaǵy (jumys istemeitin jáne biliktiligin arttyrmaityn jáne oqymaityn) azamattarǵa, jumys tájiribesi joq, bilim berý uiymdarynyń túlekterine, eńbekke jaramdy múgedekterge birinshi jumys ornyna jumysqa ornalasýǵa múmkindik beredi.
«Urpaqtar kelisimsharty» jobasy zeinetkerlik jasqa jetken jumys isteitin qyzmetkerdi keiinnen aýystyra otyryp, jumysqa ornalastyrýdy kózdeidi.
Erikti túrde qonys aýdarýǵa qatysýǵa niet bildirgen azamattardy qamtýdy keńeitý úshin qonys aýdarýshylardyń shyqqan óńirleriniń qataryna Almaty qalasy engizildi. Qonys aýdarýshylardy qabyldaý óńirlerine Aqmola jáne Qaraǵandy oblystary qosymsha engizildi, bul eńbek kúshi tapshy óńirlerdi qajetti eńbek resýrstarymen qamtamasyz etip qana qoimai, qonys aýdarýshylar úshin turǵylyqty jerdi tańdaýǵa qosymsha múmkindik beredi.
Qonys aýdarýshylardy turǵyn úimen qamtamasyz etý maqsatynda turǵyn úilerdi salý jáne satyp alý mehanizmderin eldiń barlyq óńirlerine taratý usynylady. Bul rette, Indýstriia jáne infraqurylymdyq damý ministrligi «Eńbek» baǵdarlamasynyń eńbek kúshi mol óńirlerden qonys aýdarýshylar úshin turǵyn úi salý máseleleri jónindegi operatory bolyp belgilenedi.
Joǵaryda kórsetilgen sharalar halyqtyń áleýmettik jaǵynan osal toptary qatarynan, onyń ishinde NEET sanatynan kóp azamattardy ekonomikalyq qyzmetke tartýǵa múmkindik beredi.
