QR Premer-Ministriniń orynbasary Roman Skliar eldegi turǵyn úi máselesin sheshýdiń jańa mehanizmi týraly aityp berdi, dep habarlaidy QazAqparat.
«Búginde túrli sanattaǵy 500 myńnan astam adam úi kezeginde tur. Úkimet tarapynan eldegi baspana máselesin sheshý jolynda jumys belsendi júrip jatyr. Tólem qabileti tómen turǵyndar da bar. Olar Otbasy bankiniń jeńildikpen baspana alý baǵdarlamasyna qatysa alady. Ótken jyly baspana salýda rekordtyq kórsetkishke qol jetkizdik. Elimiz boiynsha 15 mln sharshy metr turǵyn úi salyndy. Bul degenimiz - 140 myńnan astam úi. Odan bólek, satyp alý quqyǵynsyz jalǵa beriletin 9,5 myń turǵyn úi salyndy. Degenmen, atalǵan kórsetkish azdyq etip otyr», - dedi Roman Skliar Úkimet úiinde onlain ótken baspasóz máslihatynda.
Úkimet basshysy orynbasarynyń málimdeýinshe, búginde elimizde baspanaly bolýdyń jańa mehanizmi qaralyp jatyr.
«Taǵy bir jait - baspanaly bolýda Úkimet pen bank tarapynan jasalǵan jeńildikterge qaramastan tóleý múmkindigi az turǵyndar sanaty bar. Memleket basshysy atalǵan sanattaǵy azamattardyń turǵyn úi máselesin sheshý úshin baspanany satyp alý quqyǵynsyz jalǵa berýdiń jańa mehanizmin engizýdi tapsyrdy. Osy oraida biz qurylys kompaniialaryna óz aqshasyna úi salyp, ony halyq qaltasy kóteretin baǵamen satyp alý quqyǵynsyz jalǵa berýdi usynyp otyrmyz. Iaǵni, turǵyn úidi memleket emes, jeke qurylys kompaniialary turǵyzady jáne oǵan jaýapty bolady. Biz tek sýbsidiia beremiz», - deidi ol.
Onyń sózinshe, turǵyn úi saiasatyna qatysty atalǵan jańashyldyqqa Indýstriia jáne infraqurylymdyq damý ministrligi jaýapty.
