2020-2025 jyldarǵa arnalǵan densaýlyq saqtaýdy damytýdyń memlekettik baǵdarlamasy aiasynda búkil respýblikadaǵy aýrýhana infraqurylymyn jańǵyrtý josparlanǵan. Bul jaiynda QR Densaýlyq saqtaý ministrliginen málim etti, dep habarlaidy "Ult aqparat".
Vedomstvo málimetinshe, elimizdegi eskirgen 40 nysannyń ornyna halyqaralyq deńgeidegi kópbeiindi 16 aýrýhana (oblystyq kópbeiindi aýrýhana, qalalyq kópbeiindi aýrýhana, ýniversitettik klinika) salynady. Aýrýhanalar zamanaýi tehnikalyq sheshimderdi eskere otyryp josparlanady. Uzaqmerzimdi kelisimsharttar aiasynda meditsinalyq tehnikamen, aqparattyq júiemen tolyqtai jabdyqtalyp, tehnikalyq qyzmet kórsetýmen qamtamasyz etiledi.
Árbir statsionarda patsientterdi der kezinde ári sapaly diagnostikalaýǵa jáne emdeýge múmkindik beretin zamanaýi infektsiialyq korpýstar salý, klinika qyzmetkerleriniń qaýipsizdigin qamtamasyz etý, meditsinalyq uiymdardyń infektsiialyq emes jelisine júktemeni tómendetý josparlanǵan.
Aýrýhanalardy memlekettik-jekeshelik seriktestik kelisimsharty jáne ózge de uzaqmerzimdi kelisimsharttar aiasynda qurý kózdelgen. Bul biýdjetke bir mezette túzetin aýyrtpalyqtan arylýǵa múmkindik berip, shetel kapitalyn tartýǵa, aýrýhana qurylysyna jańa tehnologiialardy engizýge jáne densaýlyq saqtaý nysandarynyń paidalaný sapasyn arttyrýǵa jol ashady. Bul 5-6 jyldyń ishinde Joint Commission International (JCI) halyqaralyq standartyna sai keletin 8 myńnan astam tósek-orynǵa shaqtalǵan aldyńǵy qatarly joǵary tehnologiialyq aýrýhana jelisin qurýǵa múmindik beredi.
Atalǵan jobaǵa otandyq, sonymen qatar halyqaralyq deńgeidegi aýrýhanalar qurylysynda tájiribesi bar sheteldik kompaniialar merdiger bolady.
Aýrýhana qurylysyna qatysty jobalardy der ýaqytynda júzege asyrý úshin jobalyq kompaniia - densaýlyq saqtaý salasyndaǵy operator qurylady.
Kompaniianyń negizgi mindetteri: ázirleý kezeńinde - bul atalǵan jobalardyń barlyǵyn ákimshileý jáne úilestirý, MJS kelisimsharttaryn jasaý sharalaryn júzege asyrý; MJS kelisimsharttary boiynsha jeke seriktestiń mindetterin oryndaýyn baqylaý.
