Foto: QR DSM
2025 jyly Qazaqstanda qaitys bolǵannan keiingi donorlardan jasalǵan transplantatsiia kórsetkishi aitarlyqtai ósip, ótken jylmen salystyrǵanda 2,6 ese kóbeidi. Bul týraly Densaýlyq saqtaý ministrligindegi apparattyq keńeste Respýblikalyq transplantattaýdy úilestirý ortalyǵynyń basshysy Aidar Sitqazinov málimdedi, dep habarlaidy Ult.kz.
Onyń aitýynsha, aǵymdaǵy jyldyń 10 aiynda qaitys bolǵannan keiingi aktýaldy donorlar sany 6-dan 16-ǵa deiin eki esege jýyq artqan. Sonymen qatar eGov.kz portalynda azamattardyń aǵza donorlyǵyna kelisim berý kórsetkishi 27%-ǵa ósip, kelisim úlesi 63%-ǵa jetken.
Ministrlik málimetinshe, 2024 jylmen salystyrǵanda:
• qaitys bolǵannan keiingi donorlardan jasalatyn operatsiialar sany – 2 ese,
• tiri donorlardan jasalatyn transplantatsiia – 2,5%-ǵa artqan.
Kórsetkishterdiń jaqsarýyna eldegi infraqurylymnyń keńeiýi áser etken: byltyr 7 ortalyq jumys istese, búginde transplantatsiia jasaityn 11 ortalyq bar.
Qazir elimizde 4521 adam aǵza aýystyrýdy kútýde. Kútý tizimindegi naýqastar arasyndaǵy ólim-jitim 4,6%-ǵa tómendegen. Donorlyq belsendilik eń joǵary óńirler: Almaty jáne Astana qalalary, Pavlodar, ShQO, SQO, Almaty, Jambyl jáne BQO.
Salada kadr daiarlaýy jalǵasýda: otandyq dárigerlerdiń sheteldik bilim baǵdarlamalary keńeiip, Ispaniia, Túrkiia jáne Belarýspen yntymaqtastyq nyǵaiǵan.
Keńes qorytyndysynda Densaýlyq saqtaý ministri Aqmaral Álnazarova óńirlerde transplantatsiia baǵytyndaǵy monitoringti kúsheitýdi, shuǵyl tasymaldaýdy qamtamasyz etýdi, tsifrlyq sheshimderdi engizýdi jáne qaitys bolǵannan keiingi donorlyqty nasihattaýǵa basymdyq berýdi tapsyrdy.
