Qazaqstanda qaitalama baspana naryǵynda baǵa birtindep tómendeidi. Mundai pikirdi Qazaqstan Rieltorlary birlesken qaýymdastyǵy prezidentiniń keńesshisi Nina Lýkianenko bildirdi, dep habarlaidy QazAqparat.
«Eger osy jyldaǵy jyljymaityn múlik naryǵyn saralaityn bolsaq, onda Qazaqstanda ai saiyn búkil el aýmaǵynda 21-22 myń málimet jasalatyndyǵyn atap ótken oryndy. Bul rette virýstyń taralýyna bailanysty álemdegi ahýaldyń mámilelerge de óz áserin tigizgendigin atap ótken oryndy. Osy jyldyń kókteminde elimizde qatań karantin sharalarynyń engizilýine bailanysty adamdar shektelgen keńistikte qalýǵa májbúr boldy jáne nysanǵa baryp kórý, notariýs arqyly mámile jasap, ony tirkeý múmkindiginen aiyryldy. Sonyń saldarynan elimizde mámileler sany 5 211-ge deiin qysqardy. Al mamyrdaǵy bul kórsetkish 17 210 mámileni qurady», - dedi Nina Lýkianenko.
Onyń atap ótýinshe, maýsymda baspana satyp alý-satý mámilesi kúrt artyp, 32 121-ge jetti. Al shildede 26 688, tamyzda 30 172, qyrkúiekte 35 359 mámile jasaldy.
«Osy kórsetkishten-aq mámileler sany jyljymaityn múlik mámileleriniń ortasha ailyq standartty mólsherinen aitarlyqtai joǵarylaǵandyǵyn baiqaýǵa bolady. Degenmen, karantin sharalarynyń, ekonomikalyq ahýaldyń aiasynda jekelegen árbir otbasynyń qarjylyq jaǵdaiy jaqsara túspegeni belgili. Tipti halyqtyń tólem qabileti tómendegeni de sózsiz. Bul oraida mámileler sanynyń kúrt artýy olardy rásimdeýge múmkindik bolmaǵan kezde jinaqtalyp qalǵan suranystyń júzege asyrylýy esebinen qalyptasqanyn baiqaýǵa bolady», - dedi ol.
Nina Lýkianenko qazirgi ýaqytta baspana baǵasynyń kúrt ózgeriske ushyraýyna eshqandai alǵyshart joq ekendigin aitady.
«Biraq, qaitalama baspanaǵa qatysty jalpy tendentsiia taiaý jyldardyń ishinde baiaý tómendeýge baǵyt alatyn bolady. Al jańadan salynǵan úilerdiń quny dollar baǵasyna bailanysty aldaǵy ýaqytta da óse beredi. Óitkeni, qurylys materialdarynyń negizgi úlesi shetelden valiýtaǵa satyp alynady», - dedi Qazaqstan Rieltorlary birlesken qaýymdastyǵy prezidentiniń keńesshisi.
