Densaýlyq saqtaý ministrliginiń taýarlar men qyzmetterdiń sapasy men qaýipsizdigin baqylaý komiteti Qazaqstanda shekteý sharalary men karantindi engizý boiynsha erejeler belgilengen qaýly jobasyn jariialady, dep habarlaidy "Ult aqparat".
Qaýly jobasy Ashyq NQA portalynda jariialandy. Qujatqa sáikes tómendegi tizbede kózdelgen infektsiialyq aýrýlardyń ákeliný jáne taralý qaýpi tóngen jaǵdaida Kodekstiń 104-babyna sáikes:
- infektsiialyq aýrýlardyń taralýyn boldyrmaýǵa baǵyttalǵan;
- kásipkerlik jáne (nemese) ózge de qyzmettiń erekshe rejimin kózdeitin sharalardy qamtityn shekteý is-sharalary, onyń ishinde karantin engiziledi.
Paida bolý jáne taralý qaýpi tóngen kezde shekteý is-sharalary, onyń ishinde karantin engiziletin infektsiialyq aýrýlardyń ataýy:
1. Oba
2. Tyrysqaq
3. Sary qyzba
4. Virýstyq gemorragiialyq qyzbalar
5. Aýyr jiti respiratorlyq sindrom (AJRS)
6. Virýstyń jańa kishi tipi týdyrǵan adam tumaýy
7. Virýstyń jańa kishi tipi týdyrǵan koronavirýstyq infektsiia
«Infektsiialyq jáne parazittik aýrýlardyń Qazaqstan Respýblikasynyń aýmaǵyna ákeliný jáne (nemese) Qazaqstan Respýblikasynyń búkil aýmaǵynda taralý qaýpi tóngen jaǵdaida Qazaqstan Respýblikasynyń bas memlekettik sanitariialyq dárigeri Eýraziialyq ekonomikalyq odaqtyń kedendik shekarasymen tuspa-tus keletin Qazaqstan Respýblikasynyń Memlekettik shekarasy arqyly ótkizý pýnktterinde nemese Qazaqstan Respýblikasynyń búkil aýmaǵynda kásipkerlik jáne (nemese) ózge de qyzmettiń jáne halyqtyń ómir súrýiniń erekshe jaǵdailarymen shekteý is-sharalaryn, onyń ishinde karantin engizedi», - delingen qujatta.
Tizbede kózdelmegen infektsiialyq aýrýlardyń paida bolý jáne taralý qaýpi tóngen jaǵdaida jekelegen aýmaqtarda (obektilerde) shekteý is-sharalary, onyń ishinde karantin Qazaqstan Respýblikasynyń bas memlekettik sanitariialyq dárigeriniń nemese tiisti ákimshilik-aýmaqtyq birliktiń (kóliktegi) bas memlekettik sanitariialyq dárigeriniń qaýlysymen, sondai-aq ózge de memlekettik organdardyń vedomstvolyq obektilerinde Kodekstiń 104-babyna sáikes halyqtyń sanitariialyq-epidemiologiialyq salamattylyǵy salasyndaǵy memlekettik organnyń qurylymdyq bólimsheleriniń bas memlekettik sanitariialyq dárigeriniń sheshimimen engiziledi. Qaýly jobasy 28 tamyzdan bastap 14 qyrkúiekke deiin talqylaý satysynda bolady.
