Elimizde zeinetkerlik jasqa jetken 2 millionnan astam adam bar. Bul jaiynda QR Eńbek jáne halyqty áleýmettik qorǵaý ministri Birjan Nurymbetovtiń Májilis depýtattarynyń saýalyna bergen jaýabynda aitylǵan, dep habarlaidy "Ult aqparat".
«2019 jyldyń qorytyndysy boiynsha elde zeinetkerlik jasqa jetken 2 millionnan astam adam bar. Olardyń ishinde biýdjet qarajaty esebinen úide kútim jasaý jaǵdaiynda arnaýly áleýmettik qyzmettermen qamtamasyz etilgen egde jastaǵy adamdar sany 38 myńnan asady. Bul Qazaqstan Respýblikasynyń aýmaǵynda turatyn qarttardyń barlyq sanynyń 1,2 paiyzyn quraidy», - dedi ol.
Sondai-aq, ministr Qazaqstan Respýblikasynyń halyqty áleýmettik qorǵaý salasyndaǵy zańnamasynda halyqty áleýmettik qorǵaý salasyndaǵy ýákiletti organ aiqyndaityn tártippen arnaýly áleýmettik qyzmetterdiń kepildik berilgen kóleminen tys aqyly negizde arnaýly áleýmettik qyzmetterdi usyný múmkindigi kózdelgenin aitady.
«Ministrlik zeinetkerlik jasqa jetken egde jastaǵy adamdardy qoldaý úshin keshendi sharalar qabyldaýda. Máselen, sońǵy 20 jylda zeinetaqynyń eń tómengi mólsheri shamamen 12 esege (3 000 – nan 36 108 teńgege deiin), zeinetaqynyń ortasha mólsheri – 14,1 esege (4 179-dan 58 725 teńgege deiin), zeinetaqynyń eń joǵary mólsheri – 12 esege (7 256-dan 87 113 teńgege deiin) óskenin aita ketý kerek. Sonymen qatar, Qazaqstan Respýblikasyn áleýmettik damytýdyń 2030 jylǵa deiingi tujyrymdamasyna sáikes ministrlik álemdik ozyq tájiribege jáne «estitin memleket» qaǵidattaryna sáikes qarttardy qoldaý jáne olardy qoǵamǵa tartý jóninde birqatar shara qabyldaýdy josparlap otyr», - dedi Birjan Nurymbetov.
