Biylǵy qańtar aiynda respýblikalyq biýdjetten bazalyq zeinetaqy tóleý úshin – 62,1 mlrd teńge, yntymaqty zeinetaqy tólemderine 138,4 mlrd teńge baǵyttaldy, dep habarlaidy "Ult aqparat".
QR Eńbek jáne halyqty áleýmettik qorǵaý ministrliginen málim etkendei,
2020 jylǵy 1 aqpandaǵy jaǵdai boiynsha Qazaqstanda zeinetkerler sany 2 mln 222 myń 500 adamdy quraidy.
Zeinetaqy tólemderiniń ortasha mólsheri (bazalyq zeinetaqy tólemderin qosa alǵanda) 2020 jyldyń 1 aqpanyna 90 502 teńgeni qurady.
Esterińizge sala keteiik, 2018 jylǵy 1 shildeden bastap memlekettik bazalyq zeinetaqy tólemi zeinetaqy júiesine qatysý merzimine qarai ár alýshyǵa jeke taǵaiyndalady.
«Eger zeinetaqy júiesine qatysý ótili 10 jyl nemese odan az bolsa, nemese múldem bolmasa, bazalyq zeinetaqynyń mólsheri eń tómengi kúnkóris deńgeiiniń 54% quraidy (2020 jyly eń tómengi kúnkóris deńgeii – 31183 teńge), sodan keiin 10 jyldan asqan ár jyl úshin onyń mólsheri 2% artyp otyrady. Mysaly, qatysý ótili 20 jyl bolǵan jaǵdaida bazalyq zeinetaqy eń tómengi kúnkóris deńgeiiniń 74%, 30 jyl – eń tómengi kúnkóris deńgeiiniń 94% quraidy. Jumys ótili 33 jyl jáne odan da kóp bolǵan kezde, ol eń tómengi kúnkóris deńgeiiniń 100% maksimaldy mólsherinde belgilenedi.
Osylaisha, azamattyń zeinetkerlik jasqa jetkendegi bazalyq zeinetaqy tóleminiń mólsheri mindetti zeinetaqy jarnalary qanshalyqty turaqty jáne tolyq tólengenine bailanysty bolady», - dedi ministrlikten.
Óz kezeginde, jasyna bailanysty zeinetaqy tólemderiniń mólsheri (yntymaqty) 1998 jylǵy 1 qańtardaǵy jumys ótiline (kem degende 6 ai qajet) jáne zeinetke deiingi kezeńde alynǵan ortasha ailyq tabysqa bailanysty bolady.
